Gavino sanik

Kösöms Sardänik.

EUGENIA FORNAROLI.

Jevals ämekoms nevifiko e ko töb xänedi da Scala di Ciocca; ni op, op äplöpoms belifön kopi nimas pöfik. Äjinos obe (äsiadob su mied söpa al logön omis lovegolön) das aniks nimas et pöfik tovöl boso kapi äviloms-la sagön: Ö lönel, binos düps mödik das binol is suso e a tel, develö!

Äbinos tumat bal de feilels monitöl alim ko vom bal kobo, kels se tops mödumik nisula ägoloms al Portotores plo zäl gletik de Gavino sanik. Sanikel jalepik tu mödo, ab ye äyuloböv das loviklöd e nenol ejafomsote cödatadi so badik.

Niludolsöd das löfü Gavino sanik mens mödik disagoloms in disatalöps glüga e us flapomsok dub lefad; ye binos velatik das ans dunoms somo das flaps faloms bundaniko su nilels. Ab denupükobs dö tlup monitelas.

Ätävon sis düps mödik e voms pöfik älabofs logodi neledik e logis fenik, ab ye äbinofs nog venudikün in klotads ofsik so fömadifik balim de votim.

Älogon vomi yunik ko klot e vomaköf klöfa ledik, jimateli ko klotad velutik e veal blägik su kap, vomi bäledik ko nudod vidik, yulibik, ko kluzif gletik, yelibik, pemagöl suso, petanöl dub tips tel disü cün, du tips tel votik faloms pesetenöl su blötaklot e su klot; jiselednikün ka jivaliks äbinof vom de Tempio ko disaklot bal su kap.

Äsibinoms klots klöfa blägik e yulibik; blötaklots veluta, de klöf, de stof pegolüdöl; gnobs de golüd e de silef, gletiks äs nöts; veals blägik, vietik, namaklöfs pepladöl zi kap modü jikleudels de misalad.

Valemo, mans binoms nejönik, log omsik labom sepeti fefik; aniks ko helaflök lonedik falöl su bäk, ko köfs blägik, ko skin de jigolad modü klot, ko gün tavelo. Ägoloms löpo lielöl glökemi kel äkömom de fag. Äbinos lemöd de glöks gletik, de glökils, de smaglöks, de glöks tonik de glöks stilik boso, kels ämigoms kobotonis omsik. Konzed et isezugom obi se dlims poedik e ipälom in tikäl obik döli fänelik: glöks valik et äjinoms obe koköm sembal vomas, kelofs eninzunöl balimik ta votimik älabofs-la desidi gletik givön balvotiko flapis.

Enakömöl su kam fagik hol bal se Sassari, tlup monitelas et imekom stopi. Mans idisagoloms de jeval al tenön limis e steiföl dunön püdi ko jeval peninzunöl du voms äleodofs klotis e helis ofsik. Jianiks äzugofs pö vomakofi, jivotiks ästegofs veali difiko u äplatofs lamaveadis. Täno mans äxänoms denu su jeval e pos düp lafik äningoloms in Sassari.

Sassari yofik, liflik, pükotik, pleidk dem gads oka ko ziedabims e fluks kels zigoloms zifi äs zönül, äzälom in del et zäli telik: gödelo, sukefi de Vilgin sanik lanelas: pozendelo, kosekami leloda se Sassari al Portotorres. NIludolsöd kofud kiom äsibinom in kap nisulelas.

Sukef sanik isegolom se glüg de ^.... polöl da zif ködabi VIlgina su tlon pegolüdöl. Feb alik labom giti tanön tanili bal po mäned Vilgina, du vobel bal feba e kana alik golom pö, pleidik kipöl fini votik tanila. Tanils lonedik e blefik, vidik e nabik, kölas valik kluzifoms okis po jots Vilgina. E pö ägolom möd sembal klerelas, koblodas, de voms, de bäledans pleköl. Pop bösetik ädilom oki ven sukef sanik änilom e pos ägolom pö in möd gletikum.

Tlup feilelas dö kel epükob ya, istopom du gol sukefa sanik. Voms älogedofs lestimiko ti ko dled: nidi tlona e lanelas pegolüdöl kels äzümoms Vilgini; spagami flamadas valik et: lemödi et kel tadilo älogedom vilikumo klotis jönik e logis gletik e jönikün de jifeilels et ka sukefi sanik pelogöl e pedenulogöl so mödikna.

Len düp folid, äkosekon lelodi. Se süt alik, plad e sütil, möd ägolom äl Porta S^.... la stajen: de Alghero, de Ozieri, de Nuoro e de tops nog fagikum ikömoms feilels e söls. Kofud kimik dialegas! bevü kels ut de Alghero, selednikum ka votiks bi binom katälänapük perüböl.

Lemüf äbladom e, alina das äfeifom, lemöd nulälik ädatovom logodi, änepükom, älüodom logis äl stajen e äbesumom natemi. Kisi ägolom da tikäl feifelas et kels igoloms so mödiks al Sassari? Sepet semik de nüläl tlepik e ti jekamik äpubom su logods et.

Süpito feifot lonedik ätonodom, lefog blägik äxänom stedik, ädilomok poso a tufs in lut e lezug pedeköl dub stäns yofik, zälöl ämogolom: feilels älogedoms fimiko milagi et kel ägolom bivedo, pemoföl fa näm klänafulik e täno ämosumoms köfi e äfaloms su kiens, du voms pejeköl äpedofs manis ofsik, gekipöl luvoki. Bevüno, milag ifegolom; milag et kel ämütom mopolön flapis löfü Gavino sanik e tanilis pelägöl mänede Vilgina.

Se Volapükabled Tälik 1888, Nüm: 7, Pads: 51-52.