Garzóm ch’a vá in Ulánda
Garzóm ch’a vá in Ulánda
A sum pòuru, sum pisnígn,
Ma sum bóm da purtaa l sac’c’,
E in Ulánda damatígn
I ò da naa cun gran curágg.
A v salüdi, pá e máma,
A v salüdi c’èur e vac’c’.
Lá dalünsg u i è chi d ciáma,
I ò da naa, sum stècc asbác’c’.
Se i la vall a várdi int,
Ciöö! L da piènsg ch’a m sgúnfia i öcc
E lu còr u m batt indínt,
E u par tütt ch’a végna nöcc.
Bèll muntágn, gnii dré cun mí,
Gnii cun mí, cumpègn d’etá,
Vièlt rodènsgian fòra i l rí,
Pérzi e brügn sgiü i l ört dlu pá!
Fign sgiü sótt ala ravòlta,
Mí sgiá indré na várdi pü,
Perchè sénza, pòch per vòlta,
Lu curágg al drèc’i sgiü.
Vè da staa sésc ènn intréi
Sénza vdèe l nösc campanígn,
Sénza l vèrd e i fiür di prèi,
Sénza l lécc béll mulasgígn.
Sénza l’áta e sénza máma,
L’è bé pöi da piènsgiai sü;
Ma s’a tórni, u uèss bé bráma!
U èss bé pöi da murii pü!
Bégn, stèe alèiri vièlt tió inscí,
Pinsèe dré a chi d vá vèe!
Pinsèi dré um po’ ánc’e a mí
Quánd, mái sü, u vlii prièe.
Tegni déss déss int i l còr
Bégn caldígn lu nösc pensía;
Cunsulémas, che l’amór
Ad distánz u n cugnúsc mía.