Gúlmiseń (Qayıpnazarov)
Gúmis shıqlar shaqasında mólt etken,
Seni tańnıń gúli desem, gúlmiseń,
Nur sáwlesi júregimde jılt etken,
Óz baxtımnıń kúni desem, kúnbiseń.
Saǵımı taralar sharqı pálekke,
Kún shıǵıstan kúlip atqan tańbısań.
Jilwalı názerler salar hálekke,
Ya men ushın jaratılgan janbısań.
Qaddine say jasıl lipas pardozı,
Jayma shuwak, jarqıraǵan jazbısań.
Aydınlar ústine sardar párwazı,
Kóldiń jarasıǵı quba ǵazbısań.
Sawsaqlar saǵınar sırlı pernesin,
Sazendeler háues tilla sazbısań,
Burınǵıday júzge tutpas perdesin,
Zamanǵa ılayıq sárwi nazbısań.
Diydilegen mánziline tetelep,
Íǵbal soqpaǵına túsken izbiseń.
Duslasar ekenbiz úmit jetelep,
Diydar nesip eter arıw júzbiseń.
Jolıńa tóseler gúller tógilip,
Shámenler ishinde gezgen húrmiseń.
Kózlerime ottay ısıq kórinip,
Bul jaqtı dúnyanı bezep júrmiseń.
Iyni kelse turar aytqan wádede,
Shın azamat mártti izlep júrmiseń.
Qumar kózden taysalıp hár kádemde,
Ózińdi ózgeden giznep júrmisen.
Jaslıq waqıtlarda jańılıs ketken,
Muhabbat qátesin dúzep júrmiseń.
Hakıyqat kewilden usınıs etken,
Ya sen bir júrekti gózlep júrmiseń?!