Gúllerim (Qayıpnazarov)
Otırdım bir úlken kumnıń ústinde,
Qalǵan suwdı, sharshap, shóllep ishtim de,
Júrip kettim qos truba tiyelgen,
Mashinama minip jolǵa tústim de.
Sap boldı janımda suw menen nanım,
Alǵa iytermeler namısım-arım,
Benzini tawsıldı mashinanıń da,
Qumlar arasında qısıldı janım.
Ilgeri júrmedim, qaytpadım izge,
Ilaj joq, bárine shıdawdan ózge,
Qıyada qaldırmas doslarım izlep,—
Keler degen úmit elesler kózge.
Bárha oylaǵanım sizler edińiz,
Jaqın keleshekti gózler edińiz,
Jeńisli barmasam siz kútken úyge,
Bilemen bir kúni izler edińiz.
Kelgen joqpan ataq izlep jaǵınıp,
Islep júrmen hújdanıma baǵınıp,
Qum ishinde kóz aldıma keltirip,
Kewlim sergir ózlerińdi saǵınıp.
Baǵlarda gúl kórsem, kórdim sizlerdi,
Qumlarda gúl kórsem, kórdim sizlerdi,
Nágada bir jerde qonaqta bolsam,
Úylerde gúl kórsem, kórdim sizlerdi.
Qızıl qumda ótken qızıq kúnlerim,
Aspandı jamılıp jatqan túnlerim,
Úyde bolsam úymelesken janıma,
Úrpe-shúrpe meniń náwshe gúllerim.
Men shıqqan saparǵa shıǵarsız sizler,
Kútip alar burın kórmegen dúzler,
Alǵan baǵdarıńnan adaspassızlar,
Baslap kele berer men basqam izler.
«Jawın jawar, abılaysań sel bolar,
Suwsız shóller aydın shalqar kól bolar»,
Samal bolsa tınbay kóshken shańǵıtıp,
Espe qumlar egis bolar, el bolar.
Maǵan kuwat berdi etken islerim,
Astan-gesten qılǵan qumnıń ishlerin,
Ayaqlay almasam men óz isimdi,
Dawam ettirersiz deymen ózleriń.
Bul jerde kim ushın islegenimdi,
Sonda bilesizler meniń gúllerim!