Gúller menen kút (Qayıpnazarov)
Gúllerdi jazarman, gúller berer yosh,
Gúller arasında júrsem kewlim xosh,
Diydar nesip etse, kórgiń kelse dos,
Meni kúter bolsań, gúller menen kút.
Saǵan aytılajaq sırım bul meniń,
Ápiwayı gúl emes jazar gúllerim,
Yadqa túser narttay jaslıq kúnlerim,
Meni kúter bolsań, gúller menen kút.
Gúl degen bul áziz doslar ózleriń,
Gúldey jaynap turar ısıq júzleriń,
Sol gúllerdi qıysa maǵan kózleriń,
Meni kúter bolsań gúller menen kút.
Jáne qaytıp kelsem jaslıq kúnlerge,
Tájim etsem usı janlı gúllerge,
Óz juparın shashar aylı túnlerge,
Meni kúter bolsań, gúller menen kút.