Gúldáste (Qayıpnazarov)

by Bayniyaz Qayıpnazarov

Jilwa etip qıya baqqan,
Ayday húsniń húrge teńles.
Qumay kóziń kúlim qaqqan,
Baǵ ishinde gúlge megzes.

Jarasıqlı júzlerińe,
Osma bolsam qasıńa men.
Uyqı kelse kózlerińe,
Dastıq bolsam basıńa men.

Tún uyqıńa selteń bermey,
Saqshı bolsam keshe menen.
Kórer kózdi órtey bermey,
Júrer bolsań kóshe menen.

Suw sebelep jollarıńa,
Kútip tursam sennen páste,
Alarsań ba qollarıńa,
Bolsam ózim bir gúldáste.

Ya karamay óterseń be,
Keterseń be jeldey esip.
Ya iráhim eterseń be,
Iyiń bosap, árden túsip.