Gúl kúser (Qayıpnazarov)
Báhár keler, jaz keler,
Úyrek keler, ǵaz keler,
Aral ústin toltırıp,
Aydınlarǵa saz keler.
Vaǵ ishinde gúl óser,
Gúl júzine kún túser,
Dostıń kewlin kaldırsań,
Kókiregine kir túser.
Jel páseyse kól tınar,
Muz erise seń ıǵar,
Qarlı boran, qıs ketse,
Kún jılısa kók shıǵar.
Jasıl dónse japıraq,
Tursa tańday jarqırap,
Sıldırlasa bulaqlar,
Dárya aǵar sarqırap.
Jawın jawsa sel bolar,
Końsı qonsa el bolar,
Kúsh jıyılsa—qúdiret,
Suw jıyılsa kól bolar.
Tamshı tamsa tas teser,
Dawıl tınsa jel eser,
Kewli tassa kisiniń,
Dúnyada joq gúl kúser.