Flukatimaseif
Ya da liad ä biad vienabläd lukalodik ävirom; flukatim binom lezüdik e daegik, ag! kö nü hitatim äsmülom. Pab eseitomok al deilöni. Nif flitäda omik binom fenik; flol ebölüdöl väpi oma vedom püf. Bims eklotomsok denu in yelibikos e ledikos; fotil nelabom kaniti; kopanöm poedalas peteilom; sol aidisigolom lesuno, aismülom moliko kol foti e disom lolaledik ini golüd ä glut.
O, sol, liko fug ola vifik aipedom blöti tala! Lilolsös, liko lovosagom plafik: »nog aibinob lifavamik.» Ag; if ol ovilol-la osi, ogivolöv obe lifi nog, osükidolöv denu hitatimi pefugöl! Pleidik estanob vöno; lad obik äkugom todik; legivolös obe nu te spagi gluta vönik ola! Flol oba binom nu deiläfik; lieg obik äbinom te olik.
Eko, daflodob is! O! blibolös lenü ob! Yed, if vo binos vip olik, ovalädob nog miegik e klödob, das yed osükol semdelo lamami oba denu. Ovilol flanön suno nifatimamüti, dat flolatim stalöl oflolom-la.
Se Volapükisten 1889, Nüm: 53, Pad: 6.