Fidam jevalamita in Paris
Lilädels talopik li sevoms das lödels Glezifa Fransäna efidoms, du yel 1894, jevalis 21,231, cukis 276 e mucukis 61?
Ninludob das noteds anik tefü atos onitedoms omis.
Anu, pösods mödik isik fidoms kosömo[1] jevalamiti e pabülogos das num atas oglofom suno, kodü mödam nezedik kosta fidadinas valik.
Dido mit at no binom so gudik äs xolamit; kanob besiön atosi bi ästebob in Paris du klig lätik e emutob fidön jevalamiti du muls mödik äs kozifans valik oba, in tim sica.
Pin jevala binom yelibik e leülik e mit binom ofeno düfik e stünik. Blefo, sosus ekanob fidön mitis votik, elüvob gäliko jevalamiti. Ab fidam mita at no palüvom fa valikans, e mödikans kels ibeginoms fidön omi bi no äkanoms fidön votikosi efovoms dunön somiko kodü nedelid fida at: mitens 184 sibinöl anu in Paris - e plöpöl - blöfoms atosi nebefeito.
Kost jevalamita cenom natiko segun liköf nimadila; dils gudikum papeloms frans tel a miglam, e dils bapikün zims 80 u 40.
Liko mitels jevalamitik dunoms al dagetön numi so gletik nimas al cenön in fid? Malit nonik sibinom in Paris plo selam at.
Mitel alik labom brokelis nemödik kels tävoms du laned e notedoms nimis pötik al palemön. Brokel getom prämi a jeval alik patuvöl fa om ab no pelom nimi om it; no binos kösömik givön moni brokeles; li binos defü konfid?
Sosus mitel sevom das, in dil sembal läna, num sätik nimas kanom palemön al vedön mit, motävom, konletom jevalis e cukis düna nefägik, e blinom lodoti valik in Paris, me lelod.
Mitelöp jevalik te bal sibinom linedü daems parisik; panemom Abattoir de Villejuif e seistom Boulevard de l'Hôpital in dil sulüdik glezifa.
Te in top at jevals pamiteloms, e nims luüno luls pafunoms a del.
Mitelöps binoms nevelo plads gälik e jönik, ab Abattoir de Villejuif binom vo plad lejekik. Bumots binoms bäledik, pedebleköl, miotik e badosmelöl; topöps gagikün usik binoms yadils peködutöl fa mitels, in kels visitans lutlidoms in släm bludik, e kö götems vitimas, götems at legletik yebafidanas, pasetopoms du del lölik.
Sotimo, nim pekodemöl vedom lejeklik sosus nütlidom in top hölik at, ab jek pekodedom te dub lestun nepesevikosa e no dub bülogam flapa fätik.
Jevals kömöl se laned pamufäloms plu ka uts eliföl lonedo in Paris, len kels nos jinos kodedön plu tlepi anik.
Masek skitik sembal papladom su kap valikas al veilön logis; zenodü masek at, visü zenodapün kapaboma, lelastam mufik sibinom. Vitiman nilikömom, flapom lelastami me fög vätik, lel dugimom zebümi e nim falom süpito, pefunik. Ezedom dolön.
Lekluf sembal papladom vifiko in lög poik e nim palägom, kap donivedo valadöl mitani.
E peditöl in dils mödik, mit omik ogolom suno da zif, al pladalön, su tab vobela pöfik, xolamiti, evedöl tu delidik.
NOETS. (Vükifonät)
- ↑ Bükapök; pla: kösömo.
Se Kosmopolan 1896, Nüm: 28, Pad: 276.