Ezzelentissema Camaretta!
Isepp Zanoja (1752-1817)
Ezzelentissema Camaretta!
El pover Meneghin, serva umelissem
di voster ezzelenz, l'ha parsentii
a dì d'intorna propi per verissem
che l'oltra sira lor se sien unii
tucc i sessanta insemma a fà session
per despones se quij del trentarii
ne vegnissen a romp la devozion.
Oh Signor, ghe n'è anmò de bulardee?
Che avessem de tornà tucc a monton!
Se serem mò giustaa!... Basta, in Verzee
mi n'hoo sentii paricc; e tucc insemma
emm faa i nost conclusion lì in sui duu pee.
Chi diseva, o che semm o che no semma;
che vegnen pur; ghe la faremm vedè.
Chi diseva, scior nò, on poo pu de flemma:
gh'è tropp lamped d'intorna;... ghi emm del pè.
On olter dis: coss'ela sta baretta
che ne vœuren fà mett in sul topè?
Per dincio, in sul mè coo no vuj de metta.
In somma hin tanc i ciaccer che s'è faa,
che seccarev tutta la Camaretta,
se ghi voress cuntà. In fin gh'è staa
on omm de quij del temp de sant Ambrœus,
propi de quij che fan autoritaa,
l'è soltaa su e l'ha ditt: Ziffola Bœus,
che passa el dord; violter tananan
disii di lapp, e mi me sentì a cœus.
[...]