Esten shıqpas aydala (Qayıpnazarov)
Qolı kús-kús, jarıq-jarıq tabanı,
Jalań ayaq gezgen jazıq dalanı,
Taldan kesken qayqı tayaq qolında,
Kórippediń sarı shopan balanı?!
Aydalada aydaǵanı qoy edi,
Sıqılı joq sobırayǵan boy edi,
Házir qayda: Házir qanday kásipte,
Bilseń sóyle, burınǵısın qoy endi.
Sol jılları-aq qoy baǵıwdı taslaptı,
Oqıw oqıp, sawat asha baslaptı:
Bayaǵıda, kús-kús bolǵan qolına,
Tayaq emes qaǵaz, qálem uslaptı.
Aqbas, jantaq ósken sheńgel arasın,
Qum basında shoq jıńǵıldıń sayasın,
Xat isine, kánt ishinde júrse de,
Ol kúseydi sol qoy baqqan dalasın.