En ocajion che l reverendiscem preve Don Valantin Partel
- En ocajion che l reverendiscem preve Don Valantin Partel
- tol posses de la Pieif de Fascia l dì de sèn Jan de jugn del 1856.
- Na cianzon per la jent bona
- Oves meae audiunt vocem meam. Mie fede scouta mia ousc. Sen Jan X 27.
Stajon algegres! – Tin, ton, tan
Tirà polit chele ciampane!
Pum, pum, pum, pum - Sbarà pardiane!
L'é n piovan nef, e l'é sèn Jan.
Voi orghenist sonà sù ben!
Prest clarinec, flauc e sciubioc
Tree! - tombre, bombardogn, fagoc
Sofiage ite, par dì de legn!
Ou! mena cà per chel gramial
Bianch; sora l ciaf! e sora l piet,
Sot'amba! A n auter dal corpet
Ros, e vestì da bandieral.
Touse da la zendalina,
Dai ciuzarins da marochin,
Dal camelot ben fat e fin,
Dai bie pie rosc, da la bustina!
Mo zirolave! Voi velgiac
Troà mo cà la ciamejela
Bruna o verda; prest, metela;
Lascià ch' i grigne i joegn mac.
Velgiuce! voi meté l colar
Da ciadenele, e da bechec.
O brugn o verc ence i corpec
Lonc, e i scufioc, lasciài vardar.
Fajege pur festa al paster nef!
Mo pensà mo che che l'à dit!
Tegnìlo a ment, fajé polit,
fossade bogn; e jì a la pieif.
Con devozion, no compagné:
A jir te lejia e a n pech de messa,
N pech de vida la ge volessa,
Senó paron tenc deslaibé.
Pitores, beches da la val
E pelacrisć, musciac, concéres
Segnores, sec, en curt duc peres
Fascegn! scusonse; nia permal!
Recordonse che sion fede;
L'é l paster soul chel che comana,
Se l'obedesc, no se domana
Perché e percó se la entenede.
Donca se fasc descheche El vel,
Che i fenc laore, e che i vadagne,
Che i fae polit, e no i ne magne
Sun pive o auter, nience pel.
Fossà voi touse rencurade,
Tegnì bel net, e sparagnà;
Coscì al piovan ge piajarà;
Fajege l mus a le bulade.
Voi po, velgiuce, e voi velgiac,
No assà più superstizion:
Saslonch, Pordoi, Vael, Duron
chisc l'é dut monc sche i autres, mac!
No monc da strie no, pantalogn!
Con ste bujìe se fasc spaent
Ai peres bec, e po la jent
Ne disc che sion gregn asenogn.
Fenìla donca. Jent dal cher
Scutà che che l piovan ve disc,
Dal fantolin al velge grisc
Scutalo duc, perché – se mer!
Obedì dut; e se l comana
Che n preve endana che l disc messa
No l ve confesse, se l dijessa
Che al descors e a messa grana
Stae chiec i preves, l fasc ben! –
Se se confesse dò le unesc,
O domesdì, e dapò lunesc
Se se ordenee, se fasc besegn.
Ence chest piovan l vel la pasc
Del bon Gejù, duc la volon;
Mo fosc se la mantegnaron
Zenza ciapar del Crist sui nasc,
E zenza trota! N procescion
Fosc pa che chest Reverendiscem
L portarà chel Die sentiscim,
Mo zenza cente e confalon,
Per no begar. No ge contà
De chela bega en sènt'Ulgiana;
Se no, fosc fosc par dì de Diana
Chest sarà chel che ve outarà.
Se sie ben fat vardar n tous,
Che tira i bòzoi contra l vent,
E no adorar l Sacrament
L lo dirà El. Ió son curious.
Me piasc veder co i se l trasc sù –
Mo die bel schiet, la devozion
La é pecia, e l'é na distrazion
Sta usanza; miec l'é tirarla jù.
Voi pare e mare! da valenc,
Vardà vesc fantolins poiousc
Famé, stracé e snariliousc;
E i gregn, brauzoi e spifenc
A bai i spen l'òr e l'arjent
Per volge, pìndoi e corai
Peze da sen, bordi e gramiai:
Coscì l piovan no l'é content.
Scusame ades se ve é enirà,
Ve voi veder n pech miores,
E colpa che sion peciadores
Mai no ne piasc la verità.
Se un dijessa mal de voi: mincion
Matolge, flentes, descreanzà
Gnoch, toch de àsen, desbocià
Ge dijesse, e scoderzon.
No lasce mai dir mal de voi;
I lode e i lodaré i fascegn;
A duc ge die: i é bogn cristiegn
Chel mal ch' é dit resta entra noi.
Noi aon abù vescovi, canones,
Capitanes, gregn piovegn,
Curac, e frati, e capelegn,
E n'aon amò, e no da Nonesc.
Oh! per compirge vosc azet,
Confidà en El volege ben jent,
Dapò l piovan sarà content
Mo soraldut portage respet;
E basta. Algegres. Tin, ton, tan,
Tirà polit chele ciampane.
Pum, pum, pum, pum - Sbarà pardiane!
L' é n piovan nef, e l'é sèn Jan.