Ellerim bardı

by Ájiniyaz

Sorasań elimdi Qojban bizlerden,
Qalpaǵı qazanday ellerim bardı.
Qəte shıqsa, keshirińler sózlerden,
Qıtay, Qonırat atlı ellerim bardı,

Jaylawım Úrgenish, arqası — teńiz,
Jawırını qaqpaqtay malları semiz,
Ruxsatsız bir-birine salmas iz,
Birlikli Qońırat ellerim bardı.

Tabıladı izlegenniń keregi,
Kólinde bar qasqaldaǵı, úyregi,
Quwları, ǵazınıń, pútin búyregi,
Dúnyanın ańları kólimde bardı.

Ótirikti ıras etip aytpaǵan,
Tuwrı joldan bas ketse de qaytpaǵan,
Nəməhrəmdi hasla joldas tutpaǵan,
Atı qaraqalpaq ellerim bardı,

Seylegende sheker eter sezińdi,
Kórgende biymaǵrur eter ózińdi,
Baharı toydırar eki kózindi,
Ləyli, Zúləyxaday qızları bardı.

Súyrik sawsaǵında periwza yúzik,
Belleri qınalǵan bir qısım nəzik,
Hər qolında altın-gúmis bilezik.
Sallanıp məs gezen qızları bardı.

Atqa shıqqan ashamaylı-qıyatta,
Qoldawlı-múyteniw — barlıq Qonıratta,
Qıtay-qıpshaq, kenegesiw mańǵıtta,
At kótermes belli begleri bardı.

Gúdarı belbewi dizege túsken,
Boyı aq terekti aralap ósken,
Ǵanım kórse qaynap dəryaday yoshqan,
Qalpaqtıń qalqanlı jigiti bardı.

Belleskende xan palwanın qoymaǵan,
Kúsh-qarıwı bir boyına sıymaǵan,
Shaqırmasa merekege barmaǵan,
Qonırattın gújektey palwanı bardı.

Yadıma túskende kewlim ósken,
Kózim kórmegenshe kókeyim kesken,
Jılında miywelep úsh iret pisken,
Atı sútilmektey jemisim bardı.

Sərhawız boyında sayalı terek,
Jeseń til úyirgen əseliw pəlek,
Qırında qızarıp pisken gewirek,
Qawınday mazalı jemisim bardı.

Mal iyesin tabar, sóz tapsa júye,
Shebinde shəfəət, qusında kiye,
Teńiz eteginde bolar qanshiye,
Bulardıń bərshesi elimde bardı.

Kórmegen hayranda esleri tanar,
Úrgenish naqqashı maqbari minar,
Baǵlarımda bisyar almayıw-anar,
Hesapsız mazalı miywesi bardı.

Jilwa taslap hərne barın saz etken,
Jigitlerdiń kewlin bəhər, jaz etken,
Qasın qaǵıp jilwə bilən naz etken,
Baǵlardın ishinde qızları bardı.

Men buyerde júrgen ishi zərdeli,
El jurttı kórmegen aǵır dərdeli,
Kewlimniń xoshı joq men həm bir dərtli,
Aytsam ishte tolǵan hádiysim bardı.

Nesip aydap siziń ellerge kelgen,
Kim jaqsı, kim jaman parqını bilgen,
Hár ne barın sizge bayan áylegen,
Qalpaqtıń Kámiyne Ziywarı bardı.