El perzenti (Qayıpnazarov)
Isi júrgen pát qosılıp pátine,
Ózi ılayıqlı jurt húrmetine,
Xalqı ushın jumsap oyın-jigerin,
Bar kúshin sarp etken eldiń isine.
Jigitti sınawǵa jarasańızlar,
Tip-tik tulǵasına qarasańızlar,
Iyman júzli peshanası kelisken,
Bul azamat kim dep sorasańızlar:
Kishi peyil, júzi ısıq sımbatlı,
El perzenti óz xalqına qımbatlı,
Gúllendirip awıl menen qalanı,
El basqarǵan er ol Qállibek atlı.
Bina bolǵan onıń aqıl-kúshinen,
Tez-tez boy tiklegen izli-izinen,
Qatar-qatar kóshelerge jarasqan,
Bálent jaylar sóyler etken isinen.
Elim dep, xalqım dep juwırıp jeldi,
Ullı is basladı nıq buwıp beldi,
Ol pitkergen kóp islerdiń birewi,
Shımbay elatına temir jol keldi.
Awır júkti kótergen óz iyninde,
Qáne sonday er kóp bolsa elimde!
Xalqı ushın jan kúydirip islese,
Jeńer edi qıyınlıqtıń bárin de.
Pátlendirip istiń barlıq túrlerin,
Bozlarda jaynatıp miynet gúllerin,
Tuwılǵan úlkeni abadan etip,
El basqarıp júrgen sol bir kúnleriń.
Qaytarǵanday waqtıń qıstıń qáhárin,
Jaqsı ótti jas jigitlik máháliń,
Juptıń menen saw-salamat jasay ber,
Kútip alsın dál júzinshi báháriń.