El pan
(Leopoldo Fasanotti)
El pan l'è fresh, l'è poss, l'è moresin,
L'è dur, l'è sor, l'è morbid o mottaa,
L'è pan luster, pan dolz, pan gross, pan fin,
L'è croccant o l'è moll e infarinaa,
Hin micch, micchett, pagnott, chiffer, grissin,
Pan frances, pan de spagna, e pan pepaa,
Pan de mej, de mistura, pan mangin,
Pan bianc, pan giald, pan ner, pan fatt, salaa.
L'è'l pan d'or di bagaj che se l'insogna,
L'è pan de sciori e pan per tucc i dent,
Pan brusaa d'ona part o sora o sott,
L'è pan de pasta dura, pan biscott,
L'è pan sudaa, l'è'l pan de la vergogna,
E l'è pan che se mangia a tradiment.