El ballon del “gioco del calcio”

by Giorgio Bolza

El ballôn del “gioco del calcio”

No ghe pò vèss nissun pussee fottùu
de mì che sont nassùu
per vèss ciappaa a pesciâd, trattaa coi pee,
e vann a gara a chi me ’n dann pussee.
Tutt i domènegh... sott’ a famm la festa!
Hinn vintitrii che pesta,
e per un ôra e mezza ghe dann dent
a damm pesciâd per fà godè la gent.
Come la sia, la capissi nò!
Comè che a pestà giò
sti fiôr de giovinott che vedi a côrr
guadagnen tanti ghèj e tanto onôr?...
A lavorà coi pee, la ghe voeur tutta,
l’è incoeu on mestee che frutta;
difatti i giornalôni al lunedì
hinn dedicaa ai pesciâd che dann a mì.
Ma pazienza anmò per quij che giùga...;
hinn quij schisciaa ’mè l’uga
dent in la tìna: voeuri dì i gadàn
che sbràgia, che sifolla e batt i man.
Al frècc, al cald, qualonque temp el faga,
tutta sta gent la paga
per vegnimm a vedè, e che scalmanàda
se ciappen tucc, quand bronchi ona pesciàda.
E capita di volt che sti ciollott
se mòllen di scuffiott,
tant che me ven de dì: vardee on ballôn
come ’l mett tanta gent in rebelliôn!
Del rest, andemm, a pensaggh sù polît,
gh’è minga tant de rîd...;
sont on ballôn, l’è vera, però in fond
l’è a cascià ball che cùnta in de sto mond!