Doslarımnıń arqası (Qayıpnazarov)
Den sawlıqta dáwlet penen baxıtta,
Doslar menen birge keldi qosıla,
Bas awırıp, baltır sızlar waqıtta,
Qádir biler doslar keldi qasıma.
Bóliskendey boldı nawqas jaǵdayın,
Quwat berdi miyrim tolı sózleri.
Qanday jaqsı dos degenler hárdayım,
Hal sorasın kelip tursa ózleri.
Men jatsamda sırqat penen tiresip,
Jeńdirmespen, sawalarman bir kúni.
Mennen beter shaqqanıraq gúresip,
Urqan atar ómirimniń hár gúli.
Sonda da doslarım doslıǵın eter,
Qollap júrer, súyew bolar hár jerde,
Janıma juwımas hesh qáwip, hesh qáter,
Hesh jekkelik kelmes doslar bar jerde.
Úmit, tilek ármanına ushlasıp,
Oylarına oylarımnın jalǵası.
Hárkún tańda diydarına duslasıp,
Jasaǵanım doslarımnıń arqası.