Doslıqtıń kúshi (Qayıpnazarov)
Júrdi babalarım xannan qısılıp,
Qol ushın bergendey ǵamxordı izlep.
Jaqsı niyet penen erkin usınıp,
Seniń menen xámdam bolıwdı gózlep.
Bir márt babam dárgayıńa barǵanda,
Onıń ármanların túsindiń durıs.
Óz xalqınıń ótinishin aytkanda,
Qollap, quwatlawǵa sóz berdiń rus!
Gúresli jıllarda, qısılshań kúnde,
Tek sennen kútkenbiz úlken úmitti.
Gey-geyde irilik sóz bolǵan jerde,
Kayıńıńa teńeymiz boyshań jigitti.
Xaq kewilden saǵan arqa súyegen,
Seni jaqın kórip isengen elmiz.
Qosılıp jasawdı ózi qálegen,
Mángi tatıwlıqtı kúsegen elmiz.
Nur jaynaǵan bir shámenniń ishinde,
Alıs-beris etip kelisken elmiz.
Júz jıllap sınalǵan doslıq kúshinde,
Barıs-kelis etip enisken elmiz.
Bir-birewdiń isenimin aqlaǵan,
Bas ketse de sózde turısqan xalıqpız.
Jańa tártip, jańa joldı jaqlaǵan,
Rus, qaraqalpaq tuwısqan xalıqpız.
Mángige buzılmas, irgeles irgem,
Bir maqsette islenedi isimiz.
Awız birshiligimiz miytindey bekkem,
Sol bekkem doslıqta biziń kúshimiz.