Descrizione della sua abitazione
Fabi Vares (1570-1630)
Descrizione della sua abitazione
No 'm domandé de grazia dove stó.
Che maladetto sia, stó d'ona cà
dov' no poss dì nè nogg mai repossà
dal fregg e dal fracass e dal spuzó.
Ona cà sott ai copp che quand ghe vó
g'hó semper scent basij da numerà,
dò camer da l'invers che mai no gh' dà
da nessun temp de l'ann on pó de só;
par mezz ai beccarij, par mezz al foss
dov' no s' sent nomà beché coi folciasc
che van sempr'a tajant carna e baloss;
dov' se ved nomò donn che lava strasc;
de più andà ai fenester mai non poss
che no veda a vojà sempr'on petasc.
Sui cal milla spegasc
de merda de fangitt di mé vesin
che cagan anch di vûlt sott al camin.
In l'ora del matin
g'hó pû sempr'on conzert de resegott,
de carr e de carrett, on teramott.
Ma quest a l'è nagott
respett al ciass che fan i barchirû,
i vedij di beché, i vacch, i bû.
Fra i oltr'al gh'è on fiû
d'on vesin che no 'm lassa mai dormì,
ch'el rasgia da la sera in sina al dì.
Ma cazz, mì vuj fusgì
e portà via 'na nogg la paja e 'l legg.
Maladett sia ol patron, la cà col tegg.