Dúnya júzi gúl bolsa (Qayıpnazarov)
Adamlar aytıssa adamdı gúl dep,
Tek men ushın gúllegendey usı gúl,
Kewlim aytsa gúldin qádirin bil dep,
Ózim húrmetleymen gúllerdi pútkil.
Hám men gúl ishinde biyhushpan bárha,
Qáne gúlge tolsa dúnyanıń júzi,
Sonsha keń álemde gúl tursa tánha,
Gúllep kele berse, kóp bolsa izi.
Báhár kelgen sayın jaysa japıraq,
Shaqasın shayqasa tannıń samalı,
Shámenge aylansa ana topıraq,
Gúllerdey jaynasa jerdiń jamalı.
Meńin bar ármanım jerdi toltırıp,
Gúller ósse, gúldi qazan urmasa,
Dúnyańa kórik berip tursa qulpırıp,
Xazar beretuǵın boran bolmasa.
Jahan jarasıǵı kózine ısıq,
Dúnya júzi jaynap turǵan gúl bolsa,
Sol gúllerdiń jawı tutanbay pısqıp,
Cyw quyǵan shaladay sónse, kúl bolsa.
Bul ushın barlıq gúl bir baǵ ishine,
Jámlesip ashılsa qızıl shoq bolıp,
Shaq kelmey shıraylı gúldin kúshine,
Qazan da, boran da keter joq bolıp!