Cui bon vers agrad' a auzir
Cui bon vers agrad' a auzir,
De me lo cosselh qu'el escout
Aquest c'ara comens a dir!
Que pus li er sos cors assis
En ben entendre-ls sos e-ls motz,
Ia non dira qu'el anc auzis
Melhors ditz trobatz lujnh nj prop.
Ges ben no fai az escarnir
Qui l'au, ans deu agradar mout,
Si tot l'outracujat albir,
Ab lor nesci feble fat ris
Tornon zo qu'es d'amon de sotz!
E-l be vezem que s'enantis
E l'esquerns resta de galop.
E per tal faj s'en bon gequir,
Qu'anc esquerns ni coratg' es tout:
Si bruillet no sai vim florir,
E par d'avol respeit iardis,
Can vei que la cima ni-l brotz
Non gieta frucha ni tequis,
E l'intrador n'eisson tug clop.
Era-s vol alre devezir:
Qui d'aver sai a gran comout
Be s'en deuria far servir!
Qu'en un mueg de marbotis
No-us donaria doas notz,
Pos a la boca venra-l fis
Ni-l prestre secodra l'izop.
A quec deuria sovenir
Que non agues corag' estout
Del be don nos devem iauzir,
Qu'en pauc d'ora es hom conquis!
E can ven als deriers sanglotz,
No li val honcles ni cozis,
Ni metges ab son issarop.
Ben deuria pensar morir
Qui dreitz huils garda sus lo vout:
Cossi Dieus per nos a guerir
Receup mort, e pos mort aucis
Celuj qui per nos venc en crotz!
Tug morrem, c'avers non gueris
Negun al temps plus que fetz Iop.
Mes son intrat en lonc cossir
Cels qui son al derier escout
C'a la mort no-s pot escremir
Coms ni reis ni ducs ni marquis,
E, s'enantz no-s nedeia totz
Que la mortz li serre lo vis,
Be si pot, si-s vol, trigar trop.
Totz jorns vos poiria legir!
Mas preguem cel qu'es caps e fis
Que-ns garde del enfernal potz
E que-ns met'el sieu paradis
Lay on mes Ysach e Iacop.