Civilisation e lingua universal/Secunde Parte/Capitulo 3

by Stefano Bakonyi

3. EGYPTO E LE ALTERE CIVILISATIONES PRIMARIE

Le altere populos antique adopta le general principios del civilisation sumerio-akkadian, ma revesti los per formas differente. Le differentia inter Sumer-Akkad e su proxime vicinos non es grande. Per exemplo Elam, vicino plus proxime, es un Sumer-Akkad in miniatura. Totevia, le reaction del egyptianos, plus distante e plus ingeniose - es multo differente: illes son inspirate per Sumer-Akkad a crear un civilisation proprie. Le egyptianos revesti le sumerian principios per formas e per stilo tanto differente, que le civilisation de Egypto deveni un secunde grande civilisation, le qual sembla, a prime vista, independente. In tanto, le egyptologos sembla esser ora de accordo, que le stimulo ex Sumer faceva nascer le civilisation egyptian.

Le scriptura egyptian appare prestefacte, contra que le scriptura sumerian demonstra un evolution gradual. - Le scriptura egyptian es le expression de ideas, imprestate ab Sumer. Del resto, le egyptianos, in le fase formative de lor civilisation, era inspirate tamben per altere creationes de Sumer, como le construction de naves, le architectura de brica, e alcun motivos sumerian; sin adoptar le material expression - illes crea un expression caracteristicamente egyptian.

Egypto es un grande pionero del civilisation. Jam in le epoca del grande faraones le civilisation es alte in omne ramos del vita social: agricultura, artisanato, navigation, organisation, administration e governamento in vaste scala. Tamben le tecnologia es multo developpate: ceramica, vitro, texitos, ebenisteria, artes decorative, construction naval etc.

Le egyptianos discoperi le production del cupro, quatro mille annos a.Cr. Le egyptian arte de aurification artistic inter 3000-2500 a.Cr. es comparabile con le nostre. Le cultura de habitation del classe dominante era alte. Omne cosas utile son facte belle. Litteratura existe jam in le epoca del piramides (3000-2500 a.Cr.), e flora durante le epoca 'feudal' (2500-1800 a.Cr. Le libros ha forma de rolo de papiro; on habeva grande bibliotecas de tal rolos.

Durante que in le epoca del piramides le poter e le realisationes material domina le scena, in le epoca feudal un grande progresso spiritual manifesta se. On arriva al intuition, que le deos non es solmente regulatores del mundo material, ma tamben supreme soveranos in le dominio moral - que le homine es responsabile de su actos al deos.

On habeva tamben un grande spectaculo dramatic: vita, morte, inhumation e resurrection de Osiris - un specie de 'passion' representante in un festa annual, durante plure jornos.

On habeva le poesia, tamben in forma de responsorios, como le psalmos hebraic, ma multo plus ancian que le psalmos. On habeva anque libros scientific como le 'papyro Edwin Smith', continente un tractato de chirurgia. Altere papyros contine aritmetica, basate super le sistema decimal, usate anque hodie, - tamben tractatos de algebra. On cultivava le astronomia e cognosce le differentia inter planetas e stellas fixe.

Le egyptianos era navigatores. Illes ha excavate un canal ab le confinio septentrional del Mar Rubie fin al ramo plus proxime del Nilo - un predecessor del canal de Suez - si que on poteva navigar ab le Mediterraneo usque al costas oriental de Africa et al Oceano Indian).

Plus tarde on ha constructe le colossal templos (como Karnak), simbolos del progresso religiose. On credeva que le mortos serà judicate in le 'altere mundo' per Osiris - que le bon homines pote sperar un resurrection post le morte, como Osiris era resurrecte. Le faraon Ikhnaton habeva le inspiration, que Deo es unic e soveran del tote mundo. Ille ha scripte al 'Deo unic' bellissime himnos simile al psalmos. Ikhnaton crede que Deo es le creator del mundo e le patre benigne de omne creaturas. Assì Ikhnaton es le precursor del religiones superior.

Tamben le valle del HINDUS es un loco, ubi le civilisation sumerian es propagate et adoptate, como in Egypto, in un expression differente de Sumer e caracteristic pro le vallea del Hindus. Le scriptura del cultura indian es differente del scriptura sumerian. Le archeologos ha trovate in IRAK (ubi era Sumeria) sigillos commercial con scriptura indian - un prova, que mercantes del India frequentava Sumeria, dunque existeva un connexo del due civilisationes. Como le civilisation del Hindus es plus juvene, le inspiration sumerian es probabile.

Secundo le evidentia archeologic le plus antique civilisation de CHINA, le 'SHANG', emerge post 2500 a.Cr., dunque es multo plus juvene que le civilisationes de Sumer e de Egypto, e pote esser le responsa creative a un stimulo ex Sumeria, per un civilisation intermedie, como le civilisation del Hindus. Le scriptura Shang appare altemente developpate, sin antecedentes primitive; dunque resulta ex un stimulo exterior.

Assi le civilisation sumerian succede propagar le nove maniera de viver ultra le confinios de SUMER e AKKAD. Totevia le civilisation non appare in le forma original sumerian, ma como un inspiration, un stimulo pro crear nove civilisationes differente del original sumerian.

Il es probabile, que omne primari civilisationes del mundo es inspirate per Sumeria, directe- o indirectemente.