Ciacules y batules
Ciacules y batules.
Do mëssa sun ëur de curtina
Se mbat la vedla Talina,
La fëna da Piere fumé
Cun Moidl a ciaculé.
Cie aràles ma mei inò
Ncuei ti tënieles pro.
Da uni sajon del ann
Les vëijun batulan.
Sibe frëit o sibe ciaut
La musa àles mpont aut.
De chësc y de l auter rejoneles
De duta la val cuioneles.
"I mutons de Luisa de Stina."
Scumëncia anda Talina,
"De plu stlec nen saral da giapé,
Te duta la val da urté.
Da uemes y nia dandò
Ulëssi mo vester leprò."
"Dla muta ne uei nce rujené"
Scumëncia Moidl a cunté
"La majera sabiona del luech
A dì l’ aurità y puech;
Bravé, mentì y se scassé
Vel’ d’ auter ne sala da fé."
"Chël gurmel de Iana de Stina
Respuend inò anda Talina,
"Ncuei lʼ es segur ududa
Cie sëida, cie moc, cie paruda,
Cie filzes cie zandli cie pic
A vester plëns de debic."
"Chëla Menza segur es udù
Co dijesʼa Moidl śën tu!
Mostra de spiza de freda
Ie dut l dì per streda
Vel’ d’ auter n’ arala da fé
Che sté a ciaculé."
"Chi ie pa ca via n curtina",
Damanda śën anda Talina.
"Chëla udlana lassù de Custacia
Y Custanza da Pedracia
Clara lassù da Pilon
Y Moniga da Bugon."
"Chëla jëuna de Zia dai sauc
Ciantova la mëssa sui auc,
Barblon lassù da Coi
Trajova su aut i foi.
Marcion de Jan sartëur
Culetova cul valon ntëur."
Truepes n conteles de teles
De bela y de burta noveles
Nfin chʼ i sona mesdì
Po pënseles permò a se n jì.
"O lasceme jì a cujiné."
L uem pò bën spité.
"Ie ess pa mo truep da te cunté,
Ma n’ ausse m’ arjumé.
Do dlieja s’ udonse nsci."
Dij Moidl mo dan se n jì.
Ncuei y te diesc dis mo leprò
Ne la fines giuʼ no co.