Chançon do'lh mot son plan e prim

by Arnaut Daniel

Chançon do’lh mot son plan e prim
Farai puòis que botono’lh vim
E l’auçor cim
Son de color
De mainta flor
E verdeja la fuòlha
E’l chant e’l bralh
Son a l’ombralh
Dels ausèls per la bruòlha.

Per bruòlh aug lo chant e’l refrim
E per qu’òm non me’n faça crim
Obre e lim
Mots de valor
Ab art d’Amor
Dont non ai còr que’m tuòlha ;
Ans si be’m falh
La sèc a tralh
Ont plus vas mi s’orguòlha.

Val orguòlh petit d’amador
Que lèu trabucha son senhor
Del luòc auçor
Jus al terralh
Per tal trebalh
Que de jòi lo despuòlha;
Dreitz es lagrim
Et ard’e rim
Qui’ncontr’Amor janguòlha.

Per janguolh ges no’m vir alhor,
Bona dòmna, vas cui ador ;
Mas per paor
Del devinalh,
Don jòis trassalh,
Fatz semblant que no’us vuòlha ;
Qu’an no’ns gausim
De lor noirim :
Mal m’es que lor acuòlha.

Si ben m’acuòlh tot a esdalh
Mos pensamens lai vos assalh ;
Qu’ieu chant e valh
Pel jòi que’ns fim
Lai o’ns partim ;
Dont sovent l’uòlh mi muòlha
D’ir’e de plors
E de douçor
Car per jòi ai que’m duòlha.

Ges no’m duòlh d’aor don badalh
Ni non sèc mesura ni talh ;
Sol m’o egalh
Que anc non vim
Del temps Caïm
Amador mens acuòlha
Còr trichador
Ni bausador,
Per que mos jòis capduòlha.

Bèla, qui que’s destuòlha,
Arnautz drech cor
Lai o’us onor
Car vòstre prètz capduòlha.