Buxara gúli (Qayıpnazarov)
Biyik minaralı Buxar jerinde,
Bir ájayıp gúl ósipti jetilip.
Boldırarma tilegimdi menińde,
Baǵmanınan copap kórsem ótinip.
Meni qabıl etse japıraǵın jayıp,
Aldımda ashılıp tursa usı gúl.
Iyiskelep kórsem etpese ayıp,
Úzsem shaqasına keltirmesem zil.
Qulpı dónip jaynay tússe jamalı,
Qayıl bolsa, kónse qolıma alsam.
Ay júzin jelpise tańnın samalı,
Diydilegen jerge kóterip barsam.
Otırǵızsam úyrenisse baǵıma,
Dolana-dolana ósse hár kúni,
Júregimdi tartar jaǵar janıma,
Kózdiń otın alar Buxara gúli.
Meniń kórgen gúlim aǵlası gúldiń,
Shaqasın iyilter búlbili bolsam.
Ústinde ushsamda bir neshe eldiń,
Men aylanıp kelsem tek soǵan qonsam.