Bulaq basında (Qayıpnazarov)
Men seni ushırattım bulaq basında,
Ózińde bir gúlge megzer ekenseń,
Kórse qızar bolar adam jasında,
Sen ıshqını kimge gizner ekenseń.
Sen kúlimlep turıp móldir bulaqta,
Bir sarqum suw berdiń, shólim basıldı,
Jáne ishiń degen sestiń qulaqta,
Qáwmetińdi kórip zeynim ashıldı.
Tańlar atsa kókten quyash úńilgen,
Júziń sol bulaqtıń suwınday tınıq,
Jılıt etip júrekke nurı tógilgen,
Mehir tolı kóziń turıptı tınıp.
Ushı bası tikke aspanǵa órlep,
Bulaq jaǵasında daraq ósip tur,
Jasıl japıraqlı shaqasın terbep,
Pákize bir salqın samal esip tur.
Sıldırlısı sulıw qızdıń únindey,
Tıp-tınıq bulaqtan jáne suw aldıń,
Báhárde ashılǵan dala gúlindey,
Meniń kóz aldımda sen turıp qaldıń.