Bolsań (Qayıpnazarov)
Búlbil bolsań joqtan bostan izleme,
Meniń elim baǵı-bostan emes pe?!
Shayır bolsań oydan dəstan izleme,
Turmıstıń ózi jır dəstan emes pe?!
Sheber kesteshidey, sırshıday sırlap,
Təbiyat jerime naǵıs oyıptı.
Ómir boyı tınbay baxıtın jırlap,
Gúller menen sózin jazıp qoyıptı.
Neni kerek etseń tabılar bəri,
Jerim saqıy ana, nanı, suwı pal,
Boladı hərkimniń unatqan kəri,
Sen súwretshi bolsań, kel, súwretin sal.