Biblia/Vetule Testamento/Psalmos/Psalmos 85

Psalmos

85. Tu te complaceva effunder benedictiones super tu terra!

Le populo de Deo memora quomodo Ille pardonava lor peccatos in le passato, prega ut ille les restabli in su favor, e gaude in le anticipation de su renovate benedictiones.

¹Pro le director del choro, scribite del Korahitas, un psalmo. Oh Senior! Tu te complaceva effunder benedictiones super tu terra! Tu restabliva le ben-esser de Israel^[1]. ²Tu remitteva le iniquitates de tu populo; tu pardonava omne su peccatos. (Interludio) ³Tu reteneva tote tu furia; tu desisteva de tu rabide indignation.

⁴Ora restabli nos, oh Deo de nostre salvation. Non esser displacite de nos. ⁵Esque tu remanera irascite contra nos in eterno? Esque tu extendera tu ira de generation a generation? ⁶Nonne tu reviviscera nos de novo? Alora tu populo se allegrara in te. ⁷Ostende a nos, oh Senior, tu misericordia. Imparti a nos tu salvation.

⁸Io audira quid Deo, le Senior, dice, quia ille parlara de pace a su populo, su sanctos. Non permitte que illes retorna a lor previe comportamento folle. ⁹Certemente qui le time tosto facera le experientia de su liberation; tunc su gloria habitera de novo in nostre terra. ¹⁰Misericordia e veritate se ha incontrate; justitia e pace se ha salutate con un basio. ¹¹Le veritate arboresce del terra e le justitia prospice del celo. ¹²Si, le Senior impartira su bon benedictiones, e nostre terra dara su fructo. ¹³Le justitia ambulara ante ille e preparara le via pro su ingresso.

Notas

1. O “de Jacobo”.