Biblia/Vetule Testamento/Proverbios/Proverbios 24

Le Proverbios

Capitulo 24

¹Non invidia mal personas e non desira lor compania, ²quia lor mente medita rapinas e lor parolas es perniciose.

³Le sapientia edifica domos, e le prudentia los consolida. ⁴Con le doctrina se replena cellarios de omne sorta de substantias preciose e multo agradabile.

⁵Un guerrero^[1] sage es forte, ma un homine docte es ancora plus forte. ⁶Assi, non ingagia te in un guerra sin previe diligente consultationes: le victoria depende de conferer con numerose consiliatores.

⁷Le sapientia es inattingibile^[2] a personas stulte; ubi se da judicios^[3] illes ha nihil a dicer^[4].

⁸Qui cogita facer le man essera appellate homine perniciose.

⁹Le cogitationes de un stulto es peccato e le detractor es un abomination pro omnes.

¹⁰Si tu esseva laxe in le die de angustia, tu fortitude es troppo parve.

¹¹Libera illes qui es injustemente sententiate a morte; e retene qui collabe verso le perdition^[5].

¹²Si vos vos excusa dicente: “Nos non sapeva de isto”, esque Deo non lo videra? Ille examina le cordes. Ille, qui guarda tu anima sape que tu lo sapeva. Ille repagara omnes juxta lor obras.

¹³Mangia melle, filio mie, quia illo es bon e le favo es dulcissime a tu gusto. ¹⁴Similemente, le sapientia es dulce pro tu anima. Si tu lo trova, tu habera un futuro luminose, e lo que tu spera non se perdera.

¹⁵Non face imboscadas como face le persona inique apud le domo del justos, e non face razzias ubi le justos vive.

¹⁶Septe vices poterea cader le justo e ille semper se levara. Un disastro solmente, tamen, suffice pro destruer un impio.

¹⁷Non allegra te quando tu inimicos cade, e non exultar in tu corde quando illes es ruinate. ¹⁸Quia Deo lo vide e essera displacite de te e revertera de illes su ira.

¹⁹Non te inquieta propter mal personas o sia invidiose del impios, ²⁰quia le mal personas ha nulle futuro e le lampada del impios se extinguera.

²¹Time le Senior, filio mie, e le rege; non commisce te con rebelles, ²²quia improvisemente le perdition les surprendera. Qui sape qual essera le judicio ruinose que venira sia del Senior sia del rege?

Altere dictos del Sages

²³Le sequente dictos proveni alsi del Sages. Monstrar partialitate in judicios non es bon. ²⁴Un judice qui dice al impio: “Tu es juste” : le populos le detestara e le nationes le denunciara. ²⁵Il habera, tamen, laudes pro illes qui convince le culpabile, e bon benedictiones venira super illes.

²⁶Sicut un basio super labios es ille qui da un responsa honeste.

²⁷Face diligentemente tu projectos e prepara tu agros ante edificar tu domo.

²⁸Non testifica sin causa contra tu vicinos e non deciper re illes . ²⁹E non dicer: “Nunc io va repagar les propter lo que illes me faceva!”.

³⁰Io transiva per le agro de un homine pigre e per le vinia de un homine carente de bon senso. ³¹E ecce, io videva que illos esseva replete de mal herbas^[6] e que su muros de lapides esseva destructe. ³²Lo que ibi io videva, me faceva reflecter e io apprendeva iste lection: ³³“Un poco de somno, si, io va dormir ancora un poco. Un poco ancora de brachios cruciate pro reposar, ³⁴e le paupertate te supervenira sicut un bandito, e tu mendicitate sicut un robator armate”.

Notas

1. O "homine"
2. >O "troppo excelse"
3. O "al porta"
4. O "illes non aperi lor bucca
5. O "morte", "destructioŋ". Qui es in periculo mortal
6. O "urticas".