Le Proverbios

Capitulo 18

¹Qui se insula del societate se preoccupa solmente pro se ipse; ille disprecia le judicio commun.

²Le persona stulte non se delecta in le prudentia sed in lo que su corde le suggere.

³Quando le impio superveni le contempto le accompania e con le vergonia veni le reproche.

⁴Le parolas del bucca de un homine es sicut aqua profunde; le fonte del sapientia es sicut un torrente que flue constantemente.

⁵Non es bon haber partialitate in favor de un persona impie privante le justo del justitia.

⁶Le parolas del stultos causa constante querelas e invita verberation.

⁷Le bucca del stultos es lor ruina: illes trappa se ipse con lor labios.

⁸Rumores es morsellos delicate, ma illos merge profundemente in le corde.

⁹Qui es negligente in su labor es fratre del destructor.

¹⁰Le nomine del Senior es simile a un fortalessa: le persona pie curre a refugiar se in illo e ibi trova securitate.

¹¹Personas ric reputa que lor substantias sia lor fortia; illes imagina que illos sia pro illes un alte muro de protection.

¹²Le superbia precede le destruction, le humilitate precede le honor.

¹³Qui responde ante audir le question es tanto vergoniose quanto stulte.

¹⁴Le spirito de un homine sustenta un corpore malade, ma qui pote sustentar un spirito abattite?

¹⁵Personas prudente possede scientia; lor aures es aperte a reciper cognoscientia.

¹⁶Portas se aperi ante personas generose; gente eminente les recipe.

¹⁷Le prime a parlar in un tribunal pare haber ration^[1], al minus donec su oppositor presenta su proprie argumentos.

¹⁸Ballottar le moneta face terminar argumentos; illo compone disputas inter potente adversarios.

¹⁹Un amico^[2] offendite es plus dur a expugnar quam un citate fortificate; disputas separa amicos sicut un porta serrate con barras.

²⁰Ex le fructo del bucca de un persona su stomacho essera satisfacite; con le productos de su labios ille essera satisfacite.

²¹Morte e vita es in poter del lingua, e illes qui ama emplear lo mangiara su fructo.

²²Qui trova un bon uxor trova le bon; ille obteneva del Senior un delectabile dono.

²³Un persona povre supplica humilemente, ma un persona ric responde con arrogantia.

²⁴Il ha “amicos” qui es preste a destruer se reciprocamente, ma un ver amico adhere magis quam un fratre.