Nehemia

3

Nomines del edificatores del muros de Jerusalem

¹Alora Eliashib, e le Summe Sacerdote e le altere sacerdotes comenciava le reconstruction al Porta del Greges. Illes lo consecrava e erigeva su alas, edificante le muro usque al Turre del Meah e al Turre de Hananel. ²Juxta illes laborava homines de Jericho, e preter illes Zacchur, filio de Imri.

³Le Porta del Pisces esseva edificate per le filios de Hassenaah. Illes disponeva su traves, erigeva su alas e installava su pessulos e barras.⁴Meremoth, filio de Uriah e granfilio de Hakkoz restaurava le proxime section del muro. Juxta illes laborava Meshullam, filio de Berekiah e granfilio de Meshezabel, e pois Zadok, filio de Baana. ⁵Juxta illes laborava le gente de Tekoa, quanquam lor capites refusava laborar con le supervisores del obras.

⁶Le Vetule Porta del Citate esseva restaurate per Ioiada, filio de Phasea, e Meshullam, filio de Besodeiah. Illes disponeva le traves, erigeva su alas, e installava su pessulos e barras. ⁷Juxta illes laborava Melatiah de Gibeon, Jadon de Meronoth, le gente de Gibeon e le gente de Mizpah. Iste citates esseva sub le jurisdiction del governator del provincia trans le fluvio Euphrate. ⁸Juxta il habeva Uzziel, filio de Harhaiah, le aurifice, qui laborava sur le muro. Preter ille, il habeva Hananias, membro del corporation del perfumatores. Illes ingypsava le muros del citate de Jerusalem usque al Muro Late.

⁹Rephaia, filio de Hur, le capite del medie districto de Jerusalem, esseva juxta illes sur le muro. ¹⁰Juxta illes Iedaia, filio de Harumaph, restaurava le muro contra su proprie domo, e juxta ille laborava Hattush, filio de Hashabneia. ¹¹Malkija, filio de Harim e Hasshub, filio de Pahat-moab laborava a un altere section e le Turre del Furnos. ¹²Juxta illes laborava Sellum, filio de Allohesh e su filias restaurava le section sequente. Ille esseva le capite del altere medietate del districto de Jerusalem.

¹³Le Porta del Vallea esseva restaurate del habitantes de Zanoah, sub le direction de Hanun. Illes erigeva su alas e installava su pessulos e barras. Illes alsi reparava mille cubitos de muro usque al Porta del Stercore.

¹⁴Le Porta del Stercore esseva reparate per Markijah, filio de Rechab, capite del districto de Beth-Hakkerem. Ille lo reconstrueva, erigeva su alas e installava su pessulos e barras.

¹⁵Le Porta del Fontes esseva restaurate per Shallum, filio de Col-hozeh, le capite del districto de Mizpah. Ille lo reparava, lo tegeva, erigeva su alas, e installava su pessulos e barras. Inde ille reparava le muros del piscina de Siloam, juxta le jardin del rege, e reconstrueva le muro usque al scalas que descende del Citate de David. ¹⁶Nehemia, filio de Azbuk, le capite del medie districto de Beth-zur laborava post ille. Ille reconstrueva le muro usque contra le sepulcros del familia de David usque al reservoir de aqua e al Domo del Guerreros.

¹⁷Post ille, reparationes esseva facite per un gruppo de Levitas qui laborava sub le supervision de Rehum, filio de Bani. Juxta ille laborava Hashabiah, le capite del medie districto de Keilah, que superintendeva le construction del muro in nomine de su proprie districto. ¹⁸Post ille il habeva su compaisanos sub le direction de Binnui, filio de Henadad, le capite del altere medietate del districto de Keilah. ¹⁹Juxta ille Ezer, filio de Jeshua, le capite de Mizpah, reparava un altere section del muro contra le montata verso le arsenal apud le angulo in le muro. ²⁰Post ille il habeva Baruch, filio de Zabbai, qui reparava un altere section del angulo usque al porta del domo de Elashib, le Summe Sacerdote. ²¹Meremoth, filio de Uriah e granfilio de Hakkoz reconstrueva un altere section del muro que se extende del porta del domo de Elashib usque al extremitate del domo.

²²Le proxime reparationes esseva facite del sacerdotes del regiones circumstante. ²³Post illes, Benjamin e Hasshub reparava le section contra lor casas, e Azariah, filio de Maaseiah e le granfilio de Ananiah reparava le section juxta lor domo. ²⁴Post ille il habeva Binnui, filio de Henadad, qui reconstrueva un section del muro ab le domo de Azariah usque le contraforte e le angulo. ²⁵Palal, filio de Uzai continuava le labor del altere latere del contraforte e le turre que protubera del palatio superior del rege al latere del corte del guardas. Post ille, Pedaia, filio de Parosh ²⁶e le servitores del templo que viveva sur le collina de Ophel laborava usque al area opposite le Porta del Aquas verso oriente e le turre protuberante. ²⁷Post illes le homines de Tekoa laborava a un altere section del muro, de opposite al grande turre protuberante usque al muro de Ophel.

²⁸Super le Porta del Caballo le sacerdotes reparava le muro. Cata un de illes reparava le section immediatemente contra su proprie domo. ²⁹Post illes laborava Zadok, filio de Immer contra su proprie domo, e post ille laborava Shemaiah, filio de Shecaniah, le custode del Porta Oriental. ³⁰Post ille laborava Hananiah, filio de Shelemiah e Hanun, le sexte filio de Zalaph, qui reparava un altere section, durante que Meshullam, filio de Berekiah, reconstrueva le muro contra le placia ubi ille viveva. ³¹Malkija, un del aurifices, reparava le muro usque al domo del servitores e mercantes del Templo, contra le Porta de Inspection, e usque al camera superior al angulo. ³²Le altere aurifices e mercantes reparava le muro de ille angulo usque al Porta del Greges.