Biblia/Vetule Testamento/Michea/Michea 6

Michea

6

Le causa del Senior contra Israel

¹Audi lo que le Senior dice: “Leva vos! Defende vos coram le montes. Presenta vostre causa coram le colles!”. ²Ascolta, oh montes, le accusation del Senior, e vos alsi, fundamentos del Terra! Quia le Senior ha un causa contra su populo; ille ha un contention a facer contra Israel. ³Populo mie, qual torto io vos faceva? Quomodo moleste io esseva pro vos? Responde me! ⁴De facto, io faceva vos sortir del terra de Egypto. Io liberava vos de celle placia de sclavitude. Io mandava Moses, Aaron, e Miriam pro ducer vos. ⁵Esque vos non memora, populo mie, quomodo Rege Balak de Moab habeva essayate maledicer vos, e quomodo Balaam, filio de Beor, al contrario benediceva vos? E rememora vostre viage ab Settim usque a Gilgal, quando io, le Senior, faceva tote le possibile ut vos cognosce le justitia del Senior?”.

⁶“Con quid deberea nos entrar al presentia del Senior? Con quid deberea nos plicar nostre genus ante al excelse Deo? Deberea nos entrar a su presentia con holocaustos, o con offertas de vitellos de un anno? ⁷Esque le Senior acceptarea mille arietes o multe milles torrentes de oleo? Deberea io dar le mi filio primogenite qua pagamento pro mi rebellion, mi prole - mi proprie carne e sanguine^[1] - pro mi peccato?”. ⁸No, oh populo^[2], le Senior ha vos clarmente indicate lo que es bon, e isto es lo que ille require ab vos: que vos face lo que es juste, ama le misericordia, e ambula humilemente con vostre Deo.

Le culpa e le punition de Israel

⁹Respecta^[3] le Senior si vos es sage! Su voce face appello a omnes in Jerusalem: “Le armea del destruction se approxima^[4]: le Senior lo manda. ¹⁰Que dicera io re le domos del gente malefic plenate de tresores ganiate deceptivemente? Que dicer re le intolerabile practicas de mensurar grano con mensuras dishoneste? ¹¹Como poterea io tolerar vostre mercantes qui emplea basculas e pesos dishoneste? ¹²Le riccos inter vos deveniva opulente per le medio de extortiones e violentia. Vostre citatanos es tanto accustomate al mentitas que lor linguas non pote plus dicer le veritate. ¹³Ergo io incipera percuter vos! Io portara vos al ruina propter tote vostre peccatos. ¹⁴Vos mangiara ma vos non habera unquam satis. Le dolor de vostre fame e del vacuitate del stomacho remanera. E benque vos essayara salvar vostre pecunia, al fin illo se reducera a nihil. De illo remanera vos un poco, ma io lo dara a vostre conquisitores. ¹⁵Vos seminara, ma non recoltara; vos calcara olivas, ma non habera satis oleo pro unguer vos. Vos fullara musto, ma non bibera le vino. ¹⁶Vos submitte vos solmente al edictos del mal Rege Omri e seque le mal practicas del dynastia perfide de Rege Achab! Vos seque lor politicas. Propter isto io rendera vos pro omnes un vista terribile: le habitantes del citate essera tractate con contempto, irridite per tote celles qui vide vos”.

Notas

1. O “le fructo de mi ventre”.
2. O “oh homine”.
3. O “Time”.
4. O “le virga del Senior”.