Biblia/Vetule Testamento/Isaia/Isaia 40

Isaia

40

Le Senior retorna a Jerusalem

¹“Consola, consola mi populo,” dice vostre Deo. ²“Parla al corde de Jerusalem e clama ad illa que su tempore de guerra es complite, que su punition ha essite expiate^[1]. Quia le Senior la faceva pagar duplemente^[2] pro omne su peccatos”.

³Un voce clama: “In le deserto prepara le via pro le Senior! Rende recte le semitas de nostre Deo in le solitude. ⁴Reimple le valleas e nivella montes e collinas. Arrangia le curvas e applana le locos aspere. ⁵Tunc essera revelate le gloria del Senior e omnes lo videra in le mesme tempore, quia le ore del Senior ha parlate”.

⁶Un voce diceva: “Clama!” e io^[3] diceva: “Quid debe io clamar?”. “Clama que omnes es sicut feno^[4]. Tote lor gloria es simile al flores del agros. ⁷Le feno se desicca e le flores marcesce quando le Spirito del Senior suffla super illos. Certo, le populo es sicut feno. ⁸Le feno se desicca e le flores marcesce, ma le Parola de nostre Deo permane in eterno. ⁹Super un alte monte ascende, oh Sion, messagero de bon novas! Clama in alte voce, oh Jerusalem. Clama sin timor. Dice al citates de Judah: “Vostre Deo es preste a venir!”. ¹⁰Si, le Senior Deo es preste a venir in tote su podestate^[5]. Ille dominara con su brachio forte. Ecce, ille veni e porta con se un recompensa. ¹¹Ille pascera su grege sicut un pastor. Ille portara le agnos sur su brachios. Ille les portara serrate a su corde. Ille conducera su oves per tote le via.

Senior es sin par

¹²Qui mensurava le aquas del mar con le cavo del mano o con su palmo prendeva le mensura del celos, o con un tertie parte de mesura calculava le pulvere del terra, o pesava le montes con un bascula, o le colles con un balancia? ¹³Qui comprehendeva le mente^[6] del Senior, o le dava instructiones qua su consiliero? ¹⁴Con qui ille se consultava pro reciper discernimento? Qui poterea inseniar a Deo le maniera correcte de facer le cosas^[7] o impartir a ille le cognoscentia, o monstrar a ille le via del intelligentia? ¹⁵Ecce, le nationes es como guttas in un situla; illos es como le pulvere sur un balancia. Ille subleva le insulas como si illos esseva pulvere. ¹⁶Non mesmo Libano poterea suppler satis de ligno pro le igne de un sacrificio; su animales salvage non poterea provider satis de holocaustos. ¹⁷Coram ille omne gentes non haberea satis de valor; ille los reputa como absolutemente nihil. ¹⁸A qui poterea vos comparar Deo? Qual imagine poterea vos trovar pro representar le? ¹⁹Un artisano forma un idolo; un ferrero lo placa de auro e pro illo forgia catenas de argento. ²⁰Si uno non ha bastante moneta pro un tal objecto, al minus ille selige un ligno que non putresce; deinde ille quere un artisano que produce un idolo que non cade a terra.

²¹Esque vos nunquam sapeva? Esque vos non audiva? Esque vos non esseva informate desde le initio? Esque vos es surde al parolas de Deo - le parolas que ille diceva desde le tempore in le quales le fundationes del terra esseva establite? ²²Ille es qui sede super le horizonte del terra; coram ille su habitantes es sicut locustas. Ille es qui extende le celo sicut un cortina, e lo expande sicut un tenta a habitar. ²³Ille es qui reduce le dominatores a nihil; ille rende insignificante le rectores del terra. ²⁴Illes a pena esseva plantate; a pena se radicava, ma quando ille sufflava super illes, illes esseva desiccate e le vento les ha portate via sicut stupula.

²⁵“A qui poterea vos comparar me? A qui io poterea similar?” demanda le Sancte. ²⁶"Leva in alto vostre oculos e specta! Qui creava tote iste lumines celeste? Ille es qui les conduce como un armea; ille les appella per nomine. Propter su poter absolute e impressionante fortia, necuno de illos manca al appello. ²⁷Quare dice tu, Jacobo, e quare dice tu, Israel, ‘Le Senior ignora lo que me eveni^[8] e mi Deo face abstraction de mi derecto^[9]”? ²⁸Esque vos non sape? Esque vos non audiva? Le Senior es le Deo eterne, le Creator del terra integre. Ille non deveni fatigate o lasse; su sapientia non ha limites. ²⁹Ille da fortia a qui es fatigate, a les qui care de potentia, ille da energia renovate. ³⁰Mesmo le juvenes deveni fatigate e lasse; mesmo le homines juvene e forte labe e deveni inhabile. ³¹Qui, tamen, spera^[10] in le Senior, trova fortia renovate; illes se eleva in alto como si illes habeva alas de aquila, illes curre sin devenir lasse, illes ambula sin devenir fatigate”.

Notas

1. Acceptate qua satisfaciente.
2. O “un duple portion”. Le restitution duple requirite del Lege pro le damnos causate (Cfr. Exodo 22:4:7-9).
3. O “un altere voce diceva”.
4. O “Omne carne es sicut herba”.
5. O “fortia”.
6. O “le Spirito”.
7. O “le sentiero del justitia”.
8. Litt. “mi vias”.
9. Litt. “ultrapassa mi judicio”.
10. O “expecta su adjuta”.