Biblia/Vetule Testamento/Habakkuk/Habakkuk 1

Habakkuk

I

Le plancto de Habakkuk contra le Senior

¹Le sequente es le onerose message^[1] que Deo revelava al propheta Habakkuk:

²“Usque quando, Senior, deberea io implorar tu adjuta e tu non me exaudi? Ante te io exclama: ‘Violentia!’, ma tu non interveni^[2]! ³Proque tu me face vider si tante injustitias? Proque tu tolera si tante maleficios? Destruction e violentia me confronta; on debe supportar conflictos e contentiones! ⁴Isto es le ration proque le lege perde su fortia^[3] e le justitia non es exequite. Le facto es que le impie intimida le justo e pro iste ration le justitia es pervertite.

Le Senior revela alicun surprendente novas

⁵“Reguarda le nationes e presta attention! Tu essera choccate e stupefacite! Quia io facera qualcosa durante vostre vita^[4] que nemo credera possibile, mesmo si illo esseva annunciate. ⁶Ecce, io es super le puncto de suscitar le Chaldeos^[5], ille nation implacabile e avide. Illes avantia rapidemente e de toto face tabula rase sur le facie del terra, sasiente habitationes que non les pertine. ⁷Illes es terribile e espaventabile; illes decide de se ipse lo que es juste. ⁸Lor cavallos es plus veloce que le leopardos e plus astute que le lupos del deserto. Lor cavallos galopa; lor cavallos, benque illos veni de lontano, descende rapidemente como vultures pro devorar lor preda. ⁹Omnes veni pro facer violentias, tote su visages es resolute. Illes captura prisionieros tanto facilemente como colliger sablo. ¹⁰Illes irride reges e deride governatores. omne citate fortificate es ludicrose pro illes; illes erige rampas e los conquista. ¹¹Illes procede como le vento e vade in ultra. Ma ille qui considera se esser un deo essera considerate culpabile”.

Habakkuk es preoccupate

¹²Senior, del principio^[6] tu esseva active; mi Deo soveran^[7], tu es immortal. Senior, tu les rendeva tu instrumentos de judicio. Mi Protector^[8], tu les ha appunctate como tu instrumentos de punition^[9]. ¹³Tu non pote tolerar le mal, proque tu oculos es tro pur^[10]; tu non pote condonar maleficios. Assi, como pote tu tolerar tal gente disloyal? Proque dice tu nihil quando le sceleratos devora qui es plus juste que illes? ¹⁴Tu creava le homines como le pisces del mar, como le reptiles que non ha alicuno que los governa. ¹⁵Le tyranno babylonese les subleva con un hamo; ille les pisca con le rete que ille jecta super le mar. Quando ille les attrappa in su draga, ille gaude e jubila. ¹⁶A causa de su successo ille offere sacrificios a su rete, e arde incenso a su draga, proque a causa de illos su alimento es abundante. ¹⁷Esque ille continuara a impler e vacuar su rete? Esque ille continuara a disvainar su gladio sin ulle misericordia?

Notas

1. O “oraculo”.
2. O “salva”.
3. O “perde fortia”, heb. “dormi”.
4. O “vostre dies”.
5. O “le Babyloneses”.
6. O “desde le tempores antique”.
7. O “sancte”.
8. O “rocca”.
9. O “de correction”.
10. O “munde”.