Biblia/Vetule Testamento/Ezechiel/Ezechiel 45

Ezechiel

45

Partition del pais - Lo que pertine al Senior

¹Quando vos repartira al sorte le hereditage del terra, de illo vos offerera un portion reservate^[1] al Senior, un parcella sancte del terra; su longitude essera de vinte cinque milles cubitos e le latitude de dece milles cubitos. Iste integre area essera sancte. ²De iste area essera designate pro le sanctuario un quadrato de cinque cento pro cinque cento cubitos, con un spatio libere circum illo de cinquanta cubitos. ³Sur iste extension vos mensurera un area de vinti cinque milles cubitos de longitude pro dece milles de latitude: in illo essera le sanctuario, le loco sanctissime. ⁴Illo essera le portion sacre del pais; illo pertinera al sacerdotes, le ministros del sanctuario que se approcha al Senior pro servir le. In ultra a esser un loco sancte pro le sanctuario, illo essera alsi un placia pro edificar lor casas. ⁵Un area de vinti cinque milles cubitos de longitude e dece milles de latitude essera de pertinentia del Levitas que ministra al Templo; illes recipera le proprietate de vinti cameras^[2].

⁶Apud le portion assignate al sancte parcella, vos assignara como proprietate del citate un area de cinque milles cubitos de longitude e vinti cinque milles cubitos de latitude. Illo essera pertinentia de tote le gente de Israel.

Derectos e deberes del soveran

⁷Pro le prince il habera terreno sur ambe le lateres del parcella sacre e del citate designate, al latere del parcella sacre e del citate designate, sur le latere west e sur le latere est; illo essera comparabile in longitude a un del portiones, ab le confinio west al confinio est ⁸del terreno. Isto essera in Israel su proprietate. Mi princes non opprimera plus mi populo, ma illes lassera le terra al gente de Israel conformemente a lor tribo.

⁹Le Senior Deo dice: “Basta, princes de Israel, basta con violentia e destruction! Face lo que es conforme al derecto e al justitia. Fa cessar vostre eviction de mi populo^[3]! A dicer lo es io, le Senior Deo. ¹⁰Vos debe emplear balancias juste^[4], un juste mensura pro productos siccate (un epha), e un juste mensura pro liquidos (un bath). ¹¹Le mensuras pro productos siccate e pro liquidos debe esser le mesme, le bath debe contener le decime parte de un homer, e le epha le decime parte de un homer; le homer essera le mensura standard. ¹²Le shekel essera de vinti gherahs. Pro vos sexanta shekels essera un mina.

¹³Iste essera le oblation que vos debera offerer: un sexto de un epha ex un homer de frumento; un sexto de un epha ex un homer de hordeo; ¹⁴e como portion prescribite de oleo de oliva, un decime de un bath ex cata cor (que es dece bath o un homer, proque dece baths face un homer); ¹⁵e un ove ex cata un grege de duo centos ex le placias fertile^[5] de Israel. Isto a sara date pro le oblationes^[6], le holocaustos, le sacrificios de comunion, in expiation pro le peccatos del populo. A dicer lo es io, le Senior Deo. ¹⁶Tote le population del pais debera contribuer a iste oblation e lo dara al prince de Israel. ¹⁷Il essera le deber del prince provider le holocaustos, le oblationes e le libationes pro le festas, le nove lunas e le sabbatos, pro tote le festas stabilite del populo de Israel. Ille providera pro le sacrificios de espiation, le oblation, le holocausto e le sacrificio de communion pro le espiation del peccatos del populo de Israel”.

Purification del Templo e del Israelitas

¹⁸Isto es lo que dice le Senior Deo: “In le prime mense, le prime die del mense, vos debe prender un juvene tauro sin defectos e purificar le santuario. ¹⁹Le sacerdote prendera un poco del sanguine del animal offerite in sacrificio pro le peccato e lo unguera sur le poste del porta del templo, sur le quatro angulos del bordo del altar, e sur le poste del porta del corte interne. ²⁰Isto es lo que vos debe facer in le septime die del mense pro quicunque committe un peccato con inadvertentia o ignorantia. Assi vos purificara le templo.

²¹In le prime mense, le die dece-quatro del mense, vos celebrara le Pasca, e se mangiara pan sin levatura. ²²In celle die le prince providera pro su culpas e pro le culpas de tote le populo del pais un tauro. ²³Durante le septe dies del festa ille providera como holocausto pro le Senior septe tauros e septe arietes, totes sin defectos, pro cata uno del septe dies, e un capro cata die pro le sacrificio pro le peccato. ²⁴Ille providera como offerta de frumento un efa pro cata un tauro, un efa pro cata un ariete, e un hin de oleo de oliva pro cata epha de frumento. ²⁵In le septime mense, le die dece-quinte del mense, al festa^[7], ille facera le mesme provisiones pro le sacrificios de espiation pro le peccatos, pro le holocaustos, pro le offerta de frumento e de oleo de oliva, pro le septe dies.

Notas

1. O “un contribution”.
2. O, secundo le LXX “le placia pro lor citates, ubi illes habitera”.
3. Le evictiones committite per le potentes al damno del minus fortunate es describite in 1 Reges 21:1-16; Jeremia 22:1-5,13-17; Michea 6:10-12.
4. Legislation previe concernente iste practica pote esser trovate in Levitico 19:35-36; Deuteronomio 25:13-16; Michea 6:10-12.
5. O “irrigate”.
6. O “offertas de frumento”.
7. Le Festa del Tabernaculos (Exodo 23:16; 34:22; Deuteronomio 16:16).