Biblia/Nove Testamento/Timotheo/1Timotheo 5

Prime epistola a Timotheo

Capitulo 5

Instructiones pro gruppos specific

¹Non parla aspremente a un homine vetule, ma exhorta le como un patre. Parla a homines juvene como fratres, ²a feminas plus ancian como matres, e a feminas plus juvene como sorores - con puressa complete.

³Honora le viduas qui es vermente in necessitate^[1]. ⁴Si, tamen, un vidua ha filios o granfilios, illes deberea primo apprender a exequer lor deberes verso le proprie familia e assi recompensar lor genitores con lo que les es debite. Isto place al Senior^[2]. ⁵Le vidua, tamen, qui es vermente in necessitate e completemente sol, spera in Deo e persevera in supplicationes e prece jorno e nocte. ⁶Ma illa qui vive pro le placer pote esser considerate morte^[3] mesmo si illa vive. ⁷Ordina iste cosas de sorta que le viduas sia irreprochabile. ⁸Pois que si alicuno non provide a su parentes^[4], specialmente a su proprie familia, ille denega su fide e es pejor que le incredule.

⁹Que un vidua, pro esser inscribite sur le registro del viduas, ha minus que sexanta annos, esseva le sposa de un sol marito^[5], ¹⁰e ha un bon reputation^[6], illo es, un femina qui educava filios, practicava le hospitalitate, serviva le ecclesia^[7], adjutava illes qui es in necessitate - un femina qui demonstrava omne sorta de bon obras. ¹¹Non inscribe in le registro, tamen, viduas plus juvene, proque illas poterea persequer desiderios sensual in opposition a Christo; illas vole sponsar se, ¹²e assi incurrer in un judicio pro haber infringite lor previe fidantia. ¹³In ultra a isto, vadente de casa a casa, illas apprende non solmente esser otiose, ma etiam garrule e intrigante, parlante de cosas que non las concerne^[8]. ¹⁴Io vole, assi, que le feminas plus juvene se marita, educa filios, governa lor casa, pro non dar al adversario alicun opportunitate de vilificar^[9] nos. ¹⁵Pois que jam alicun de illas se disviava pro sequer Satana. ¹⁶Si alicun credente ha viduas in su familia, que ille las adjuta. Le ecclesia non deberea esser aggravate. Assi illo potera adjutar le viduas qui es vermente in necessitate^[10].

¹⁷Le ancianos^[11] qui ben conduce^[12] lor ecclesia, sia reputate digne de duple honor, specialmente illes qui labora durmente in predicar e in inseniar. ¹⁸Le Scriptura, de facto, dice: “Non musellar le bove durante que illo calca le grano^[13]” e “le obrero merita su salario^[14]”. ¹⁹Non accepta un accusation contra un anciano^[15], a minus que illo sia confirmate per duo o tres testes^[16]. ²⁰Qui es culpabile^[17] de un peccato sia reprochate in presentia de omnes como admonition pro le restante. ²¹Coram Deo, Christo Jesus e le angelos electe, io solemnemente te da le responsabilitate^[18] de exequer iste commandos sin prejudicio o partialitate de ulle sorta. ²²Non consecra alicuno al ministerio christian^[19] in haste identificante te assi con le peccatos de alteres. Conserva te pur. ²³Non continua biber solmente aqua, ma bibe alsi un poco de vino pro adjuvar tu digestion^[20] e a causa de tu frequente infirmitates.

²⁴Le peccatos de alicunes es obvie e les precede in le judicamento, ma pro alteres, illos es discoperite plus tarde. ²⁵Similemente le bon obras es anque obvie, e illos que non lo es, non remanera celate.

Notas

1. O “qui es vermente vidue”.
2. O “Isto es acceptabile coram Deo”.
3. O “es morte”.
4. O “al sues”.
5. O “un femina maritate solmente un vice” o “fidel a su proprie marito”.
6. O “es recognoscite per su bon obras”.
7. Lit. “lavava le pedes del sanctos”
8. O “inopportun”, “non necessari”.
9. O “de maledicentia”.
10. O “le viduas qui vermente es viduas”.
11. O “Le presbyteros”.
12. O “preside”.
13. O “tribula”. Citation de Deuteronomio 25:4.
14. Citation de Luca 10:7.
15. O “un presbytero”.
16. Allusion a Deuteronomio 17:6; 19:15.
17. Inter le ancianos, non in general.
18. O “le carga”.
19. Lit. “impone le manos”.
20. O “a causa de tu stomacho”.