Biblia/Nove Testamento/Thessalonicenses/2Thessalonicenses 3

Secunde epistola al Thessalonicenses

Capitulo 3

Requesta de preces

¹Finalmente, preca pro nos, fratres e sorores, a que le parola del Senior se diffunde rapidemente e sia honorate como de facto jam illo es inter vos, ²e a que nos sia liberate de un gente perverse e malefic. De facto non omnes ha fide. ³Le Senior, tamen, es fidel, e ille confirmara e protegera vos ab le mal. ⁴In ultra, nos confide re vos in le Senior que vos face e facera lo que nos commanda. ⁵Ora que le Senior dirige vostre cordes verso le amor de Deo e le constantia^[1] de Christo.

Illes qui non vive in maniera disciplinate

⁶Nos commanda vos, fratres e sorores, in le nomine de nostre Senior Jesus Christo, de retraher vos de fratres qui vive in maniera indisciplinate^[2] e non secundo le tradition^[3] que illes recipeva ab nos. ⁷Pois que vos ipse sape como vos debe imitar nos, proque nos non comportava nos sin disciplina inter vos; ⁸nos non mangiava le alimentos^[4] de alicuno sin pagar^[5] ma con travalio e fatiga nos laborava nocte e jorno pro non gravar super alicun de vos. ⁹Isto non es proque nos non ha un tal derecto, ma pro devenir un exemplo pro vos a imitar. ¹⁰Pois que mesmo quando nos esseva con vos, nos usava dar a vos iste commando: “Si alicuno non vole laborar, non mesmo ille deberea mangiar”. ¹¹Nos audi, de facto, que alicunos inter vos vive in maniera indisciplinate, sin laborar, ma ingerente se in le labor de alteres. ¹²A istes nos commanda e exhorta in le nomine del Senior Jesus Christo, de laborar quietemente e assi mangiar le pan que illes mesme pro se provideva^[6]. ¹³Ma vos, fratres e sorores, non sia unquam fatigate^[7] in facer le ben. ¹⁴Ma si qualcuno non obedi al parolas de iste epistola, prende nota special de tal persona e evita su compania a que ille se avergonia. ¹⁵Totevia, non considera le como un inimico, ma admonesta le como un fratre.

Conclusion

¹⁶Ora que le Senior ipse del pace dona semper a vos le pace. Le Senior sia con vos omnes. ¹⁷Io, Paulo, scribe iste salutation con mi proprie mano. Io face assi in omne mi epistola como signatura personal^[8]. ¹⁸Le gratia de nostre Senior Jesus Christo sia con vos omnes.

Notas

1. O “patientia”.
2. Super toto “in maniera otiose”, vide vv. 8-11.
3. O “inseniamento”.
4. O “le pan”.
5. O “gratuitemente”.
6. O “que illes mangia le proprie pan, quietemente laborante”.
7. O “non cessa”.
8. Durante que epistolas de Paulo esseva sovente scribite per secretarios, scribas.