Biblia/Nove Testamento/Thessalonicenses/1Thessalonicenses 4

Prime epistola al Thessalonicenses

Capitulo 4

Un vita que place a Deo

¹Finalmente, fratres e sorores, nos vos implora e exhorta in le senior Jesus Christo a que sicut vos apprehendeva ab nos como vos debe viver^[1] e placer a Deo (e vos nunc vive assi), que vos progrede semper plus. ²Pois que vos sape qual commandamentos nos dava vos per le Senior Jesus. ³Isto es le voluntate de Deo: que vos sanctifica vos, que vos abstine vos del immoralitate sexual^[2], ⁴que cata uno de vos sape posseder le proprie corpore in sanctitate e honor, ⁵non in passiones luxuriose como le gentiles^[3] qui non cognosce Deo. ⁶In iste question nemo debera violar le derectos^[4] de su fratre o avantagiar se^[5] de ille, proque in tote iste casos, Deo es le vindicator, como nos alsi diceva vos antea e admonestava vos solemnemente^[6]. ⁷Pois que Deo non vocava nos al impuritate ma al sanctification. ⁸Qui, ergo, rejecta isto, non rejecta un autoritate human, ma Deo ipse, le qual dona a vos le Sancte Spirito.

⁹In re le amor fraterne, vos non necessita que a vos alicuno scribe, proque vos ipse esseva jam instruite per Deo amar le unes le alteres. ¹⁰Indubitabilemente vos jam lo practica verso tote le fratres e le sorores in tote le Macedonia, ma nos exhorta vos, fratres e sorores, a facer lo semper plus^[7]. ¹¹Aspira a conducer un vita quiete, a facer vostre affaires^[8] e a laborar con vostre manos, como nos commandava vos. ¹²Assi vos vivera honestemente ante le societate que reguarda vos^[9] e vos non dependera^[10] de alicuno.

Le Senior retorna pro le credentes

¹³Nunc nos non vole que vos sia ignorante, fratres e sorores, re illes qui se addormiva in le somno del morte, de sorta que vos non sia contristate como illes qui non ha sperantia. ¹⁴Pois que si nos crede que Jesus moriva e resuscitava, assi anque nos crede que Deo portera con se les que se addormiva in Christo.^[11]. ¹⁵Pois que isto nos dice a vos per le parola del Senior: nos qui es vivente, le quales essera lassate usque al advento del Senior, certemente non precedera les que dormi. ¹⁶Pois que le Senior ipse descendera del celo con un crito de commando, con le voce de un archangelo e con le trompa de Deo, e le mortos in Christo resurgera primo. ¹⁷Postea nos viventes qui remaneva, essera tosto elevate con illes in le nubes e incontrara le Senior in le aere. Assi nos essera semper con le Senior. ¹⁸Ergo, incoragia le unes le alteres con iste parolas!

Notas

1. O “ambular”, “camminar”.
2. O “fornication”.
3. O “paganos”.
4. O “opprimer”.
5. O “defraudar”.
6. O “testificava”.
7. O “que vos abunda semper plus in illo”.
8. Illo es, a non occupar vos del affaires de alteres.
9. O “verso le estranieros”, o “illes de foras”.
10. O “non essera in necessitate”.
11. O “como christianos”.