Biblia/Nove Testamento/Romanos/Romanos 16

Romanos

16

Salutes personal

¹Io recommenda vos vostre soror Phebe, le qual servi le ecclesia in Cenchrea^[1], ²a que vos pote reciper la in le Senior in maniera digne del sanctos e a que vos pote adjuvar la in qualcunque maniera illa vos necessita, proque illa ipse esseva de grande adjuta a multes, me includite. ³Saluta Priscilla e Aquila, mi collaboratores in Christo Jesus. ⁴Illes riscava lor proprie vita^[2] pro me. Non solmente io, ma tote le ecclesias del Gentiles es grate a illes. ⁵Saluta alsi le ecclesia que se reuni in lor casa. Saluta mi car amico Epeneto, le qual es le prime converso^[3] a Christo in le provincia de Asia^[4]. ⁶Saluta Maria qui ha laborate multo pro vos. ⁷Saluta Andronico e Junia, mi compatriotas, e mi companiones de prision. Illes es ben cognoscite per le apostolos e illes veniva^[5] a Christo ante que io. ⁸Saluta Ampliato, mi car amico^[6] in le Senior. ⁹Saluta Urbano, nostre collaborator in Christo, e mi bon amico Stachys. ¹⁰Saluta Apelle, le qual es un homine approbate in Christo. Saluta illes qui pertine al casa de Aristobulo. ¹¹Saluta Herodion, mi parente^[7]. Saluta illes qui pertine al casa de Narciso e qui es in le Senior. ¹²Saluta Tryphena e Tryphosa, qui labora pro^[8] le Senior. Saluta le amate Persida, le qual laborava durmente^[9] pro le Senior. ¹³Saluta Rufo, persona de marca^[10] in le Senior, e su matre, qui esseva alsi un matre pro me. ¹⁴Saluta Asyncrito, Phlegonte, Hermes, Patrobas, Hermas e le fratres e sorores con illes. ¹⁵Saluta Filologo e Julia, Nereo e su soror, e Olympas con tote le credentes^[11] qui es con illes. ¹⁶Va salutar le unes le alteres con un sancte basio.

¹⁷Ora io exhorta vos, fratres e sorores, que vos vigila super illes qui causa dissensiones e obstaculos^[12] contrarimente al inseniamento que vos apprendeva. Va evitar^[13] tal personas, ¹⁸proque illes es servitores non del Senior Jesus Christo ma de lor proprie appetitos^[14]. De factos, illes, con parolas dulce e flattante, decipe le mentes^[15] del personas naive^[16]. ¹⁹Vostre obedientia deveniva cognoscite ubicunque^[17] e io me allegra pro vos. Io vole, tamen, que vos sia sage in lo que es bon e innocente in lo que es mal. ²⁰Le Deo del pace tosto fullara Satan sub vostre pedes. Le gratia de nostre Senior Jesus Christo sia con vos omnes.

²¹Timotheo, mi collaborator, saluta vos. Assi face Lucio, Jason, e Sosipatro, mi parentes. ²²Io, Tertio, qui scribe iste littera, saluta vos in le Senior. ²³Gaio, qui hospita me e tote le ecclesia, saluta vos. Erasto, le tresorero del citate, saluta vos, e le fratre Quarto saluta vos. [²⁴]^[18].

^25[19] Ora, que tote le gloria vade a Deo, le qual pote reinfortiar vos - justo como dice mi Evangelio. Iste message re Jesus Christo ha revelate su projecto pro gentes de omne nation^[20], un projecto que remaneva celate^[21] desde le principio del tempore. ²⁶Ora, tamen, sicut le prophetas ha predicite e sicut le eterne Deo ha commandate, iste message es proclamate ubicunque inter gentes de omne nation, ut illes alsi le crede e le obedi. ²⁷Que tote le gloria vade a Deo, le unic sapiente, per Jesus Christo, pro semper. Amen.

Notas

1. O “diaconessa del ecclesia de Cenchrea”.
2. Litt. “collo”.
3. Litt. “primitia”.
4. O simplemente “Asia”.
5. O “esseva in Christo”. “Esser in Christo” es un concepto theologic que significa esser in communion con Christo per le medio del fide.
6. Litt. “mi amate”, o “mi fratre”.
7. O “compatriota”.
8. O “in le Senior”.
9. O “multo”.
10. O “selecte”.
11. O “sanctos”.
12. O “scandalos”.
13. O “averter”.
14. Litt. “ventre”.
15. O “cordes”.
16. O “ingenue”.
17. O “cognoscite per omnes”.
18. Alcun manuscriptos adde hic verso 24: “Le gratia del Senior nostre Jesus Christo sia con vos omnes”. Altere manuscriptos ancora adde iste phrase post verso 27.
19. Tote iste passage in le texto original es multo longe e su lectura in Interlingua esserea tro difficile. Nos ergo lo frangeva in phrases plus curte. Illo esserea, tamen, assi: “(25) A qui pote reinfortiar vos secundo mi Evangelio e le proclamation del Jesus Christo, secundo le revelation del mysterio que esseva conservate in le secreto durante longe etates, (26) ma que nunc esseva manifestate e que per le scripturas prophetic esseva facite cognoscer a tote le nationes, secundo le commando del Deo eterne, pro causar le obedientia del fide, (27) al Deo unic e sapiente, per Jesus Christo, sia gloria pro semper! Amen”.
20. O “Le Gentiles”.
21. O “secrete”.