Biblia/Nove Testamento/Romanos/Romanos 12

Romanos

12

Le consecration del vita del credente

¹De consequentia, io exhorta vos, fratres e sorores, pro le misericordia de Deo, a offerer vostre corpores in sacrificio - vivente, sancte, e agradabile a Deo. Isto es vostre culto^[1] rational. ²Non conforma vos^[2] al mundo presente^[3], ma sia transformate per le medio del renovation de vostre mente, de sorta que vos pote verificar^[4] qual es le voluntate de Deo, lo que es bon, acceptabile^[5], e perfecte.

Le conducta del humilitate

³Pois que, in virtute del gratia que me esseva accordate, io dice a cata uno de vos de non intertener un concepto de se mesme plus alte que lo que vos deberea haber, ma de pensar de se mesme con bon judicio^[6] secundo le mensura del fide que Deo distribueva a cata uno de vos. ⁴Durante que in un corpore il ha multe membros, e non tote le membros ha le mesme function, ⁵nos, qui es multes, es un sol corpore in Christo. Individualmente es membros que pertine le unes al alteres, ⁶de maniera que nos ha donos^[7] differente secundo le gratia que esseva nos accordate. Si le dono es le prophetia, qui lo recipeva debe utilisar lo in proportion a su fide. ⁷Si illo es le servicio, on debe servir; si illo es inseniar, on debe inseniar. ⁸Si illo es le exhortation, on debe exhortar; si illo es contribuer^[8], on debe facer lo con simplicitate^[9]; si illo es governar^[10], on debe facer lo con diligentia; si illo es monstrar misericordia, on debe facer lo con allegressa.

Le conducta del amor

⁹Le amor sia^[11] sin hypocrisia. Abhorre lo que es mal, adhere a lo que es bon. ¹⁰Sia affectuose le unes verso le alteres con amor mutual^[12]. Monstra ardor^[13] in honorar le unes le alteres. ¹¹Sia diligente e non pigre; sia enthusiastic in le spirito; servi le Senior. ¹²Sia gaudiose in le sperantia; supporta le suffrentias; persiste^[14] in precar. ¹³Contribue al necessitates del sanctos; practica le hospitalitate. ¹⁴Benedice qui perseque vos; benedice, non maledice. ¹⁵Allegra vos con qui se allegra; plora con qui plora. ¹⁶Vive in harmonia le unes con le alteres^[15]; non sia arrogante, ma associa^[16] vos con le humiles; non considera vos mesme sapiente^[17]. ¹⁷Non repaga a alicuno mal pro mal^[18]; considera^[19]. ¹⁸Si possibile, in quanto depende de vos, vive in pace con omnes. ¹⁹Non vindica vos, car amicos^[20] ma va lassar spatio al ira de Deo, pois que il es scribite: “Le vengiantia pertine a me. Io repagara^[21]”, ²⁰plus tosto, “si tu inimico ha fame, nutri le; si ille ha sete, face le biber; pois que in facer isto, carbones ardente se accumulara sur lor capites^[22]” ²¹Non sia vincite per le mal, ma vince le mal con le ben.

Notas

1. O “servicio”.
2. O “permitte de esser conformate”, o “adapta vos”.
3. O “a iste seculo”, “a iste etate”.
4. O “comprobar”, “experimentar”.
5. O “agradabile”.
6. O “adequate discernimento”.
7. O “donos del gratia”.
8. O “donar”.
9. O “sin duplicitate”, “sin dissimulation”, “sincermente”,
10. O “direction”, “commando”, “presidentia”. angl. leadership.
11. O “debe esser”.
12. O “fraterne”.
13. O “excelle”.
14. O “sia constante”.
15. O “prende un attitude unanime”.
16. O “condescende”.
17. O “sage”.
18. “Non repaga alicuno del mesme moneta”.
19. O “respecta”
20. O “amate mie”.
21. Citation de Deuteronomio 32:25.
22. Citation de Proverbios 25:21-22.