Biblia/Nove Testamento/Philemon

Philemon

Salutation

¹Paulo, prisionero de Christo Jesus, e Timotheo, nostre fratre, a Philemon, nostre car amico e collaborator, ²a Apphia, nostre soror, e a Archippo, nostre companion de armas, e al ecclesia que se incontra in su casa. ³Gratia a vos e pace de Deo nostre Patre e le Senior Jesus Christo!

Regratiamento pro le fide e le amor de Philemon

⁴Io semper regratia mi Deo quando io te rememora in mi preces, ⁵proque io audiva parlar de tu fide in le Senior Jesus e de tu amor pro tote le sanctos^[1]. ⁶Io preca a que le fide que tu ha in commun con nos^[2] pote facer te approfundar tu comprehension de tote le benedictiones que te pertine in Christo. ⁷Io habeva grande gaudio e consolation^[3] a causa de tu amor, proque le cordes del sanctos esseva revivificate per tu medio, fratre.

Requesta de Paulo pro Onesimo

⁸Dunque, mesmo si io haberea multe libertate^[4] in Christo pro commandar te de facer lo que il conveni facer, ⁹io prefere adressar me a te sur le base del amor - io, Paulo, un homine vetule e mesmo nunc prisionero per amor de Christo Jesus - ¹⁰io me adressa te in favor de mi filio, cuje patre spiritual io deveniva durante mi imprisionamento^[5], ille es Onesimo, ¹¹qui previemente non te esseva utile, ma qui nunc es utile sia a te que a me. ¹²Io te ha remandate ille qui es mi corde ipse. ¹³Io voleva tener le apud me, de sorta que ille poteva servir me in tu placia durante mi imprisionamento^[6] pro amor del evangelio. ¹⁴Tamen, sin tu consentimento, io non voleva facer alique, assi que tu bontate^[7] non esserea fortiate, ma voluntari. ¹⁵Pois que forsan il esseva pro iste ration que ille se separava ab te durante un breve tempore a que tu le poteva recuperar pro semper, ¹⁶non plus como un sclavo, ma como plus que un sclavo, como un car fratre. Ille lo es specialmente pro me, e mesmo de plus pro te nunc, sia in le parlar commun^[8], sia in le Senior. ¹⁷Ergo, si tu considera me como un companion, accepta le como tu facerea con me. ¹⁸Ora, si ille te defraudava de alique o si ille te debe qualcosa, debita lo a me. ¹⁹Io, Paulo, scribe iste epistola con mi proprie mano: io lo repagara. Io poterea alsi mentionar, tamen, que tu es debitor a me de te mesme. ²⁰Si, fratre, io volerea de te alicun beneficio in le Senior. Delecta mi corde in Christo. ²¹Io confideva que tu me haberea obedite: pro iste ration io te scribeva, sapiente que tu haberea facite mesmo multo plus que quanto io te pete facer. ²²Al mesme tempore alsi, prepara un allogiamento pro me, proque io spera que, per le medio de vostre preces, io essera restituite a vos.

Salutes final

²³Epaphra, mi companion de prision in Christo Jesus, te saluta. ²⁴Marco, Aristarcho, Dema, e Luca, mi collaboratores, vos saluta alsi. ²⁵Que le gratia del Senior Jesus Christo sia con vostre spirito.

Notas

1. Le christianos.
2. O “nostre communion de fide”.
3. O “incoragiamento”.
4. O “confidentia”, “resolution”.
5. O “que io generava in catenas”.
6. O “in le catenas que io porta”.
7. O “beneficio”
8. O “in le carne”.