Biblia/Nove Testamento/Mattheo/Mattheo 7

Mattheo

7

Non judica altere personas!

¹Non judica altere personas ut tu non sia judicate. ²Quia le criterio que tu emplea pro judicar essera applicate a te alsi^[1] e le mensura que tu emplea essera le mensura per le qual tu mesme essera mensurate. ³Quare vide tu le grano de sablo in le oculo de tu fratre e tu non vide le trabe que es in le tue? ⁴O quomodo pote tu dicer a tu fratre: ‘Lassa me remover le grano ab tu oculo, durante que il ha un trabe in tu oculo mesme? ⁵Hypocrita! Primo remove le trabe ab tu oculo, e tunc tu potera vider clarmente pro remover le grano ab le oculo de tu fratre!

⁶Non da lo que es sancte al canes, ni mitte vostre perlas ante porcos! Illos los calcarea sub lor pedes e, vertente se, illos vos attaccarea^[2].

Un precaria efficace

⁷Non cessa peter, e vos recipera lo que vos peteva; non cessa querer e vos trovara. Non cessa colpar e le porta vos essera aperite. ⁸Ita, quicunque pete recipe; qui quere trova; e le porta essera aperite a quicunque colpa.

⁹Qui es, inter vos, que, si vostre filio vos pete un pan, le da un lapide? ¹⁰O, si ille pete un pisce, le da un serpente? ¹¹Si ergo vos, qui es mal, sape dar bon donos a vostre filios, quanto magis vostre Patre, qui es in Celo, dara cosas bon a illes qui le los pete!

Le regula auree

¹²In omne cosas, ergo, lo que vos vole que altere personas vos face, face lo a illes alsi. Isto es le essentia de tote lo que es docite in le Lege e in le Prophetas^[3].

Le porta stricte

¹³Entra per le porta stricte, quia late es le porta e spatiose es le via que duce al perdition, e multes es illes qui entra per illo. ¹⁴Quanto stricte es le porta e ardue le via que duce al vita, e qui lo trova es pauc personas solmente!

Un arbore e su fructo

¹⁵Guarda vos de prophetas false, qui veni ad vos disguisate como oves innocue, ma qui, in realitate, es lupos vorace. ¹⁶Vos les potera recognoscer per lor fructos. Non se recolta uva de spinos o ficos de cardos, nonne? ¹⁷Similemente, omne arbores bon face fructos bon, e arbores mal face fructos mal. ¹⁸Un arbore bon non pote producer fructos mal, e un arbore mal non pote producer fructos bon. ¹⁹Omne arbores que non produce bon fructos es excidite e jectate in le foco. ²⁰Igitur, vos le recognoscera ex lor fructos.

Le ver discipulos

²¹Non omnes qui me dice: ‘Senior, Senior’, entrara in le regno del celos, ma qui de facto face le voluntate de mi Patre, qui es in Celo. ²²In le die del judicio^[4] multes me dicera: ‘Senior, Senior, esque non nos prophetisava in tu nomine, e ejectava demones in tu nomine, e in tu nomine faceva multe miraculos^[5]?’. ²³Tunc io les replicara, tamen, ‘Io nunquam cognosceva vos. Recede ab me, vos malfactores!’.

Edificar sur un fundamento solide

²⁴Omnes, ergo, qui audi mi parolas e los seque es simile a un homine sage qui edifica su domo sur le petra. ²⁵Le pluvia descendeva, le fluvios veniva, le vento irrumpeva contra celle domo, e illo non collabeva, nam illo esseva fundate sur le petra. ²⁶Omnes, qui audi mi parolas e non los seque es simile a un viro stulte, qui edificava su domo sur le arena. ²⁷Le pluvia descendeva, le fluvios veniva, le vento irrumpeva contra celle domo, e illo collabeva - e su ruina esseva grande!”.

²⁸Quando Jesus terminava dicer iste parolas, le turba esseva admirate de su doctrina, ²⁹quia ille les doceva con ver autoritate - non sicut lor magistros del lege^[6].

Notas

1. Le subjecto non mentionate es Deo: Deo judicara vos per le mesme criterio.
2. O litt. “illos vos facerea a pecias”.
3. Le Scripturas Sancte integre.
4. Litt. “In celle die”.
5. O “obras potente”..
6. O “scribas”.