Biblia/Nove Testamento/Mattheo/Mattheo 19

Mattheo

19

Discussion super le divorcio e le maritage

¹Ora, quando Jesus finiva dicer iste cosas, ille quitava Galilea e vadeva a in le region de Judea, trans le fluvio Jordan. ²Un turba innumerabile le sequeva e ibi ille sanava lor infirmos.

³Alcun phariseos accedeva a ille e essayava trappar le con iste question: “Es il licite pro un homine dimitter su proprie uxor propter qualcunque causa? ⁴Ille respondeva: “Esque vos non legeva lo que dice a iste proposito le Scripturas, que ab initio Deo les creava masculo e femina^[1]?”. ⁵E ille diceva: “Isto explica le ration quia un homine quita su patre e su matre, se conjunge a su proprie uxor e le duo deveni un sol carne^[2]. ⁶Ita illes non es plus duo ma un. Quod ergo Deo conjungeva que nemo lo separa!”. ⁷Illes les demandava: “Alora, quare Moses dice in le Lege que un homine pote dar a su uxor un libello de repudio e dimitter la?”. ⁸esus les replicava: “Moses permitteva le repudio qua concession propter le duressa de vostre cordes, ma isto non esseva quod Deo intendeva desde le initio. ⁹Ora io dice vos que quicunque dimitte su proprie uxor e se marita con un altere, committe un adulterio - excepte que su uxor le esseva infidel^[3].

¹⁰Alora le discipulos de Jesus le diceva: “Si isto es le caso, il es melio non maritar se!”. ¹¹Jesus diceva: “Non omnes poterea acceptar un tal condition, excepte illes al quales isto esseva date de poter lo facer. ¹²De facto, alcunes nasceva eunuchos e alcunes esseva facite eunuchos per alteres. Alteres ancora seligeva de nunquam maritar se^[4] propter le regno del celos. Qui pote acceptar isto, que ille lo accepta!”.

Jesus benedice infantes

¹³Tunc infantes le esseva portate, ut ille imponeva su manos super illes e precava pro illes. Le discipulos tamen reprimendava illes qui le les portava. ¹⁴Ma Jesus diceva: “Lassa que le infantes veni a me e non les prohibe venir a me, quia a tales pertine le regno del celos^[5]”. ¹⁵E, ante quitar, ille imponeva su manos sur illes.

Un juvene homine opulente

¹⁶Ora qualcuno, accedente a Jesus, le demandava: “Magistro, qual bon obras deberea io facer pro obtener le vita eterne?”. ¹⁷Jesus le replicava: “Quare tu me demanda concernente lo que es bon? Il ha solmente Uno qui es bon. Si tu tamen vole entrar in le vita, observa^[6] le commandamentos!”. ¹⁸“Quales?”, ille demandava. Jesus replicava: “Non committe homicidios, non committe adulterio, non face furtos, non rende false testimonios, ¹⁹honora tu patre e tu matre, e ama tu proximo sicut te ipse”. ²⁰Le juvene homine le diceva: “Io jam obedi a tote iste leges con tote mi corde. Que altere io debe facer^[7]?”. ²¹Jesus le diceva: “Si tu vole esser perfecte, vade, vende lo que tu possede e da lo al pauperes. Tunc tu habera un tresor in Celo. Deinde veni e seque me”. ²²Quando tamen le juvene homine audiva isto, ille se allontanava tristemente, quia ille habeva multe possessiones. ²³Alora Jesus diceva a su discipulos: “Io vos dice le veritate, il es multo difficile pro personas opulente entrar in le Regno de Deo. 1²⁴Itero io vos dice: “Il es plus facile que un camelo transi per le foramine de un aco, quam un persona opulente entra in le Regno de Deo!”.

²⁵In audir iste parolas le discipulos esseva valde surprendite e diceva: “Alora qui poterea unquam esser salvate?”. ²⁶Jesus, fixante su reguardo super illes, diceva: “Ab le puncto de vista human^[8] isto es impossibile, ma con Deo toto es possibile”. ²⁷Tunc Petro le diceva: “Ecce, nos relinqueva toto pro sequer te. Qual essera nostre recompensa?”. ²⁸Alora Jesus les diceva: “Io vos dice le veritate: in le tempore in le qual omne cosas essera regenerate, quando le Filio del Homine sedera sur su throno gloriose, vos alsi sedera sur dece-duo thronos e judicara le dece-duo tribos de Israel. ²⁹E quicunque relinque domos, o fratres, o sorores, o patre, o matre, o filios, o agros, propter mi nomine, recipera le centuplo e possedera^[9] le vita eterne. ³⁰Ma multes qui es le primes essera le ultime, e le ultimes essera le primes”.

Notas

1. Genesis 1:27; 5:2.
2. Genesis 2:24.
3. O “nisi propter fornication”. Alicun manuscriptos a isto adde: “E quicunque se marita con un femina repudiate (o divorciate) committe un adulterio. Compara Mattheo 5:32.
4. Litt. “se castrava”.
5. Le regno del celo pertine a illes qui es como iste infantes.
6. Alcun manuscriptos dice: “Continua observar le commandamentos”.
7. O “De que ancora io care?”.
8. O “apud homines”.
9. O “hereditara”.