Biblia/Nove Testamento/Mattheo/Mattheo 1

Mattheo

1

Le genealogia de Jesus Christo

¹Isto es le registro del genealogia^[1] de Jesus Christo, le filio de David, le filio de Abraham.

²Abraham esseva le patre de Isaac, Isaac esseva le patre de Jacobo, Jacobo esseva le patre^[2] de Judas e su fratres, ³Juda esseva le patre de Phares e Zara ab Tamar, Phares esseva le patre de Hesrom, Hesrom esseva le patre de Aram, ⁴Aram esseva le patre de Aminadab, Aminadab esseva le patre de Naasson, Naasson esseva le patre de Salmon, ⁵Salmon esseva le patre de Boaz (per Rachab), Boaz esseva le patre de Obed (per Ruth), Obed esseva le patre de Isai, ⁶Isai esseva le patre de David, le rege.

David esseva le patre de Salomon (per le sposa de Uria^[3]), ⁷Salomon esseva le patre de Roboam, Roboam esseva le patre de Abia, Abia esseva le patre de Asaph, ⁸Asaph esseva le patre de Iosaphat, Iosaphat esseva le patre de Ioram, Ioram esseva le patre de Ozia, ⁹Ozia esseva le patre de Joatham, Jotham esseva le patre de Achaz, Achaz esseva le patre de Ezekia, ¹⁰Ezekia esseva le patre de Manasse, Manasse esseva le patre de Amos, Amos esseva le patre de Josia, ¹¹Josia esseva le patre de Jechonia e su fratres in le tempore del deportation a Babylonia.

¹²De post le deportation a Babylonia, Jechonia esseva le patre de Salathiel, Salathiel esseva le patre de Zorobabel, ¹³Zorobabel esseva le patre de Abiud, Abiu esseva le patre de Eliakim, Eliakim esseva le patre de Azor, ¹⁴Azor esseva le patre de Sadok, Sadok esseva le patre de Achim, Achim esseva le patre de Eliud, ¹⁵Eliud esseva le patre de Eleazar, Eleazar esseva le patre de Matthan, Matthan esseva le patre de Jacobo, ¹⁶Jacobo esseva le patre de Joseph, conjuge de Maria, del qual nasceva Jesus, appellate le Christo.^[4]

¹⁷Assi, tote le generationes ab Abraham usque a David es dece-quatro generationes; e ab David usque al deportation a Babilonia es dece-quatro generationes; e ab le deportation a Babilonia usque al Christo es dece-quatro generationes.

Le nascentia de Jesus Christo

¹⁸Le nascentia Jesus Christo eveniva in iste maniera. Durante que su matre, Maria, esseva fidantiate a Joseph, ma ante que illes cohabitava, illa esseva trovate pregnante per le Spirito Sancte. ¹⁹Proque Joseph, al qual esseva promittite in matrimonio^[5], esseva un homine juste, e proque ille non voleva vider la dishonorate^[6], ille intendeva rescinder privatemente le contracto de matrimonio^[7]. ²⁰Ma durante que ille meditava re iste cosas, un angelo del Senior le appareva in un sonio e le diceva: “Joseph, filio de David, non time reciper Maria como tu conjuge, proque le infante concipite in illa, es per le Spirito Sancte. ²¹Illa parera un filio e tu le appellara Jesus^[8], proque ille salvara su populo ex lor peccatos”.

²²Tote isto occurreva pro complir lo que le Senior diceva per le medio del propheta: “Ecce! Le virgine concipera e parera un filio, e illes le appellara Emmanuel^[9]” que significa: “Deo con nos”. ²³Quando Joseph se eveliava del somno, ille faceva lo que le angelo del Senior le habeva dicite. ille acceptava Maria como su conjuge, ²⁴ma ille non habeva con illa relationes marital donec illa pareva un filio, que ille appellava Jesus.

Notas

1. O “le libro del genealogia”.
2. O “ingenerava”.
3. Bathsheba (cfr. 2 Samuel 11:3).
4. O “Messiah”, in greco “Christo”, significa: uno qui esseva consecrate per le medio de un unction.
5. O “su marito”.
6. O “denunciar la” (como adultera).
7. O “dimitter la”, le contracto esseva tunc vinculante e illo poteva esser rescindite solmente per via legal.
8. Le forma grec del nomine Iēsous, traducite in latino como Jesus, es le mesmo del nomine hebraic Yeshua (Josue), que significa “Yahweh salva” (“Yahweh” es typicamente rendite como “Senior” in le AT). Iste nomines esseva plus tosto commun in le Judea e in le Galilea del prime seculo. Como testimonia le version del LXX e le scriptor antique Josephus.
9. Un citation de Isaia 7:14.