Marco

8

Jesus nutri quatro milles personas

¹In celle dies il habeva un altere grande turba que habeva se congregate circa Jesus e que remaneva itero sin nutrimento. Jesus, assi, convocava su discipulos e les diceva: ²“Io me dole de iste turba, quia illes jam remaneva con me tres dies e illes non ha plus a mangiar. ³Si io les dimitte jejun, illes poterea evanescer in le via, e il ha inter illes qui veniva de longe”. ⁴Su discipulos le replicava: “Unde nos poterea trovar satis de pan in iste loco insulate pro nutrir tote iste personas?”. ⁵Ille les peteva: “Quante panes ha vos?”. Illes le replicava: “Septe”. ⁶Assi Jesus diceva al turba de seder se a terra. Pois ille prendeva le septe panes, regratiava Deo pro illos e los frangeva a pecias. Ille los dava a su discipulos a que illes los distribueva al turba. ⁷Poc parve pisces esseva alsi trovate, assi Jesus anque los benediceva e diceva al discipulos de distribuer los. ⁸Assi illes mangiava e totes esseva satiate. Depois on mesmo colligeva septe corbes plen del pecias relinquite. ⁹Il habeva tunc circa quatro milles personas qui mangiava. Postea Jesus les dimitteva. ¹⁰E tosto Jesus, montava in le barca con su discipulos e vadeva a in le region de Dalmanutha.

Le phariseos require un signo miraculose

¹¹Quando le Phariseos audiva que Jesus habeva arrivate, illes veniva e comenciava disputar con ille. Ponente le al prova, illes requireva que ille les monstrava un signo miraculose del celo^[1]. ¹²Quando ille audiva isto, Jesus suspirava profundemente in su spirito e diceva: “Proque iste generation crca un signo? In veritate io vos dice que nulle signo essera date a iste generation”. ¹³Assi ille retornava al barca e se dirigeva al altere ripa.

Le levatura del Phariseos e de Herode

¹⁴Ma le discipulos oblidava de portar le mangiar. Illes habeva solmente un pan con se in le barca. ¹⁵Ma Jesus les admoniva dicente: “Presta ben attention! Guarda vos del levatura del Phariseos e del levatura de Herode!”. ¹⁶Assi illes comenciava discuter inter se re non haber pan. ¹⁷Tamen, quando Jesus lo capeva, ille les diceva: “Proque vos discuteva que vos non ha pan? Ancora vos non vide nec comprehende? Ha vostre corde devenite cec? ¹⁸Vos ha oculos, totevia vos non vide. Vos ha aures, totevia vos non audi. Esque vos non rememora? ¹⁹Quando io frangeva le cinque panes pro le cinque milles, quante corbes plen de pecias vos ancora colligeva?”. Illes respondeva; “Duodece!”. ²⁰E quando io frangeva le septe panes pro le quatro milles, quante corbes plen de pecias vos ancora colligeva?”. E illes diceva: “Septe!”. ²¹Jesus alora les replicava: “Ancora vos non comprehende?”.

Un resanamento in duo phases

²²Quando illes arrivava a Bethsaida, alcunes les portava un homine cec, e illes supplicava Jesus de tanger le. ²³E prendente le mano del ceco, le duceva foras del village. Pois Jesus spueva super su oculos, poneva su manos super ille e le demandava: “Vide tu alique nunc?”. ²⁴E ille, recuperante su vista, diceva: “Io vide gente, ma io non pote vider les clarmente. Illes simila a arbores ambulante. ²⁵Alora Jesus, de novo poneva su mano super le oculos de celle homine, e ille nunc videva toto clarmente e esseva restabilite. ²⁶Assi Jesus le diceva de retornar a su casa, ma sin entrar in le village.

Le declaration de Petro re Jesus

²⁷Deinde Jesus e su discipulos quitava Galilea e montava verso le villages apud Cesarea Philippi. Dum illes camminava, ille les demandava: “Quem dice le gente que io es?”. ²⁸Illes respondeva: “Johannes Baptista, alteres dice Elia, e ancora alteres, un del cetere prophetas”. ²⁹Jesus les demandava ancora: “Ma vos, quem dice vos que io es?”. Petro replicava: “Tu es le Christo”. ³⁰Alora ille les preveniva severmente de non parlar re isto a alicuno.

Prime prediction del morte e resurrection de Jesus

³¹Alora Jesus incipeva docer les que le Filio del Homine debera patir multo e esser reprobate per le seniores, le summe sacerdotes e le expertos del Lege, esser occidite e, post tres dies, resurger. ³²Ille parlava francamente re isto. Assi Petro le prendeva a parte e incipeva reprochar le. ³³Jesus, tamen, se verteva e, reguardante su discipulos, reprochava Petro e le diceva: “Vade retro me, Satan, quia tu vide le cosas simplemente del puncto de vista human e non del puncto de vista de Deo!”.

Sequer Jesus

³⁴Deinde, Jesus, convocate le turba con su discipulos, les diceva: “Si alcuno vole sequer me, que ille denega se ipse, prende su cruce e seque me. ³⁵De facto, quicunque vole salvar su vita lo perdera, ma quicunque perde su vita propter me e le evangelio, lo salvara. ³⁶Qual beneficio poterea unquam haber un homine si ille lucra le mundo integre ipse a detrimento de su anima? ³⁷Quid poterea un homine dar in excambio pro su anima? ³⁸Si alcuno se vergonia de me e de mi parolas in iste generation plen de adulterios e de peccatos, anque le Filio del homine se vergoniara de ille quando ille retornara in le gloria de su Patre con le angelos sancte”.

Notas

↑ A confirmation de su autoritate.

[1] A confirmation de su autoritate.

[1]