Biblia/Nove Testamento/Hebreos/Hebreos 11

Epistola al Hebreos

Capitulo 11

Grande exemplos de fide

¹Ora haber fide significa esser secur^[1] de quid nos spera, esser persuadite de lo que nos ancora non vide. ²Propter illo le antiquos^[2] esseva commendate^[3] de Deo. ³Propter fide nos comprende que le integre universo^[4] esseva ordinate^[5] per le parola^[6] de Deo, ut le cosas visibile originava ex lo que es invisibile.

⁴Propter su fide Abel offereva a Deo un sacrificio plus ample que Cain, per le qual ille esseva commendate qua homine juste, quia Deo le commendava pro su offertas. E propter le exemplo de su fide ille, ben que morte, ancora parla nos.

⁵Propter su fide Enoch esseva translatate al celo sin morir^[7]. Nemo plus le videva quia il esseva Deo a translatar le a in le celo. De facto, ante su translation, ille habeva essite commendate como un homine qui placeva a Deo. ⁶Ora, sin fide il es impossibile placer a Deo, quia il es necesse que le persona qui accede a Deo crede que ille existe e que ille recompensa illes qui le quere.

⁷Propter su fide Noah, quando ille esseva prevenite in re cosas non ancora visibile, con consideration reverente ille construeva un arca pro le salvation de su familia. Per su fide Noah condemnava le resto del mundo e deveniva un herede del justitia que perveni del fide.

⁸Propter fide Abraham obediva quando ille esseva vocate exir verso un loco que plus tarde ille haberea recipite como hereditage, e ille exiva sin saper ubi ille haberea vadite. ⁹Propter fide ille viveva como un peregrino^[8] in le terra del promissa, como si illo esseva un terra estranie, e viveva in tentas con Isaac e Jacob, qui esseva coheredes con ille del mesme promissa. ¹⁰Quia ille expectava un citate con fundamentos firme^[9], cuje architecto e constructor es Deo. ¹¹Propter fide, Sara recipeva le habilitate de procrear, mesmo si illa ipse esseva sterile e preter le etate de conciper, quia Abraham considerava digne de fiducia Deo, qui le habeva date le promissa. ¹²Assi, de facto, un integre nation^[10] derivava ex iste sol homine qui esseva como morte - un nation de gente tanto numerose quanto le stellas del celo e sicut le innumerabile granos de sablo sur un plagia^[11].

¹³Omnes istes moriva in fide sin reciper lo que esseva promittite, ma illes lo spectava de longe e lo salutava. Illes recognosceva que illes esseva solmente peregrinos e hospites sur le terra. ¹⁴Quia illes qui parla in tal maniera significa que illes quere un patria. ¹⁵De facto, si illes haberea pensate al terra que illes habeva quitate, illes haberea habite le opportunitate de reverter se e retornar ibi. ¹⁶Illes, tamen, appeteva un loco melior, id es celeste. Igitur, Deo non se vergonia de appellar se lor Deo, quia ille les preparava un citate.

¹⁷Propter fide, Abraham, quando ille esseva ponite a proba, offereva Isaac qua sacrificio. Ille habeva recipite le promissas, ma ille esseva preste a offerer su filio unigenite. ¹⁸Deo le habeva dicite: “Isaac es le filio per le qual tu descendentes portara tu nomine^[12]”, ¹⁹Abraham rationava que si Isaac haberea morite, Deo haberea potite reportar lo in vita. De facto, in alicun maniera, Deo reportava Isaac ab le mortos. ²⁰Propter fide alsi, Isaac habeva benedicite Jacob e Esau concernente le futuro. ²¹Propter fide Jacob, moriente, benediceva cata uno del filios de Joseph e se inclinava in adoration durante que ille se appoiava a su virga^[13]. ²²Propter fide Joseph, al termino de su vita, mentionava le exodo del filios de Israel e dava instructiones concernente su interramento^[14].

²³Propter fide, quando Moses nasceva, su parentes le occultava durante tres menses, quia illes habeva vidite quanto ille infante esseva particularmente belle e illes non timeva le edicto del rege. ²⁴Proter fide, devenite adulte, Moses refusava esser considerate le filio del filia de Pharaon, ²⁵seligente magis esser maltractate con le populo de Deo plus tosto que gauder del transitori placeres del peccato. ²⁶Ille reputava melior suffrer per amor del Christo plus tosto que posseder le tresores de Egypto, quia ille prospiceva su grande recompensa. ²⁷Propter fide Moses relinqueva Egypto, sin timer le ira del rege, quia ille perseverava como si ille jam poteva vider lo que es invisibile. ²⁸Propter fide ille celebrava le Pascha e le effusion del sanguine sur le postes del portas, a que le angelo del morte non haberea occidite lor filios primogenite. ²⁹Propter fide illes transiva le Mar Rubie como si illo esseva terreno sic, ma quando le Egyptianos essayava facer le mesmo, illes esseva omnes tosto devorate del aquas.

³⁰Propter fide le muralias de Jericho collabeva depost que le populo de Israel habeva marchate circa illo per septe dies. ³¹Propter fide Rahab, le prostituta, non periva con le incredules, quia illa habeva date le benvenita, in pace, al exploratores israelita.

³²Que poterea io ancora dicer in ultra? Le tempore me mancarea si io haberea a tractar ancora de Gedeon, Barach, Samson, Jephte, David, Samuel, e tote le prophetas. ³³Propter fide illes conquireva regnos, administrava le justitia, ganiava lo que les esseva promittite, claudeva le ore de leones, ³⁴extingueva le impeto del foco, escappava al sectura de gladios, acquireva fortia durante infirmitates, deveniva forte durante bellos, faceva fugir armeas estranie, ³⁵e feminas recipeva de novo lor mortos per resurrectiones. Alteres, tamen, esseva torturate refusante lor liberation, e tote isto pro obtener un resurrection a un vita melior. ³⁶Alteres ancora esseva deridite e verberate, e mesmo incatenate e imprisionate. ³⁷Illes esseva lapidate, secate, assassinate con gladios. Alicunes esseva fortiate deambular vestite con pelles de oves e capras; illes esseva destitute, affligite, maltractate, ³⁸(le mundo non esseva digne de illes); illes vagava per desertos, montanias, cavernas, e aperturas del terra. ³⁹Omne istes esseva commendate per lor fide; illes, tamen, non recipeva lo que les esseva promittite. ⁴⁰Quia Deo pro nos provideva alco melior, ut non sin nos illes haberea attingite le perfection^[15].

Notas

1. O “substantia”. Gr. ὑπόστασις (substantia, substructura). Fide es le substantia de tote lo que significa le vita christian, tote lo que le christiano spera. Essentialmente fide es le fiducia que cosas ancora futur e non visibile occurrera sicut Deo los ha revelate; esser secur que Deo dice le veritate quando ille parla nos in le Scripturas. Isto es le natura basic del fide.
2. O “ancianos”, nostre ancestres in le fide.
3. O “Deo testificava a lor favor”.
4. O “le mundos”, “lo que existe in le tempore” (litt. etates).
5. O “ponite in ordine”, “formate”.
6. O “commando”.
7. O “ille non videva le morte”.
8. O “como un estraniero”.
9. O “eterne”.
10. O “filios”.
11. Un allusion a Genesis 22:17 que, a su vice, se refere a Genesis 15:5.
12. Un citation de Genesis 21:12.
13. Un citation de Genesis 47:21.
14. Iste instructiones se trova in Genesis 50:25.
15. O “consummation”.