Biblia/Joel (Markstein) nove edition

JOEL

CAPITULO 1

Le parola de Deo que era a Joel, le filio de Petuel.

² Audi isto, ancianos, e ascolta tote le habitantes del terra: Ha essite isto in vostre dies o in le dies de vostre patres? ³ Conta de isto a vostre filios e vostre filios a lor filios, e lor filios al altere generation. ⁴ Lo que le gazam^[1] relinqueva, le locusta lo mangiava, lo que remaneva post le locusta, su larva lo mangiava, e le remanente post le larva, lo mangiava le hassil^[2]. ⁵ Evelia vos, inebriatos, e plora, geme, tote le bibitores de vino, a causa del musto, proque illo sera secate ex vostre bucca. ⁶ Proque un nation ha venite a mi terra, troppo forte e innumerabile: su dentes como le dentes del leon^[3] e illo ha le dente incisive del leon^[3]. ⁷ Illo ha devastate mi vite e decortificate mi fichiero, illo lo ha denudate toto e jectate via, su brancas ha devenite blanc. ⁸ Lamenta como un virgine vestite de sacco pro su marito de juventute. ⁹ Le offertas de grano e le offertas de biber ha cessate in le domo de Deo, le prestres, servitores de Deo, luge. ¹⁰ Le campo es spoliate, se afflige le terra, proque le grano es piliate, le musto es siccate, le oleo es miserabile. ¹¹ Avergonia vos, paisanos, lamenta, viticultores pro le frumento e pro le hordeo, proque perdite es le recolta del campo. ¹² Le vite es siccate, le fichiero es miserabile, le arbore de granata, anque le palma, e le pomo de tote le arbores del campo ha devenite sic durante que le gaudio se ha desiccate ab le filios del homine. ¹³ Vesti vos de sacco e luge, lamenta, prestres, serviente del altar, veni e passa le nocte in sacco, servitores de Deo, proque le offertas de grano e le offertas de biber es retenite ex le domo de vostre Deo. ¹⁴ Declara un jejuno, convoca un assemblea, collige le seniores, tote le habitantes del terra al domo del Senior, vostre Deo, e crita al Senior. ¹⁵ Guai al die, proque le die del Senior es proxime e illo veni como le destruction del Omnipotente!^{[4] 16} Nonne ante nostre oculos es cessate le nutrimento, como gaudio e contentamento ex le domo de nostre Deo? ¹⁷ Le semines es arrugate sub le solo, le granarios es exhaurite, le magazines ruinate proque le grano ha marcite. ¹⁸ Como le bestias geme, le grege de bestial es confundite! Proque il non ha pastura pro illos, anque le grege de oves suffre! ¹⁹ Io crita a te, Deo, proque le foco ha consumite le pasturas verde e le flamma ha torrefacite le arbores del campo. ²⁰ Anque le bestias del campo aspira a te, proque le canales de aqua es siccate e le foco ha consumite le pasturas verde.

CAPITULO 2

Imbucca le trompetta in Sion e sona alarma in mi monte sacre, treme, omne habitante del terra, proque le dies del Senior veni, proque illo es proxime. ² Dies de tenebras e obscuritate, dies del nube e bruma; como le alba se extende super le montania un populo grande e forte: simile a illo non era jammais e postea non sera usque ad annos de multe generationes. ³ Ante illo consume le foco, post illo flagra le flamma, ante illo le terra es como le jardin de Eden ma postea un deserto salvage: nihil lo escappa. ⁴ Su aspecto es como illo del cavallos e illo curre como le cavallos. ⁵ Lor ruito es como illo del carros saltante super le culmines del montes o como le strepito del flamma consumente le palea o como un populo potente arrangiate al guerra. ⁶ Ante illo le populos tremera, omne facie deveni purpurinblau^[5]. ⁷ Illes curre como homines valente, como guerreros ascendente muros, omnes va in su cammino e non rumpe^[6] su sentiero; ⁸ e non repelle le un le altere, cata uno vade in su sentiero e quando cade per le gladio, illes non deveni ferite. ⁹ Illes assemblara in le citate, ascende super le muralia, curre in le domos, ascende per le fenestras, veni como fures. ¹⁰ Le terra treme ante illes, le celo trepida, le sol e le luna obscura, e le stellas retene lor splendor. ¹¹ E le Senior emitte su voce ante su armea, proque su campamento es grande, proque forte es qui executa su parola, proque le die del Senior es grande e multo terribile; qui es qui pote indurar lo?

¹² Dunque anque nunc le Senior dice: "Retorna a me ab tote vostre corde, con jejuno e plorar e con lucta." ¹³ E divelle vostre cordes e non vostre vestimentos, e retorna al Senior, vostre Deo, proque Ille es misericorde e clemente, proque Ille es tarde ad irascer e magne in le misericordia, e se relenta del calamitate. ¹⁴ Qui sape si Ille commiserara de novo e relinquera benediction — offertas de grano e offertas de biber a Jahweh vostre Deo! ¹⁵ Imbucca le trompetta in Sion, declara jejuno, convoca assembleas! ¹⁶ Reuni le populo, sanctifica le congregation, convoca le vetulos, collige le infantes e le neonatos; que le sponso sorti ex su camera e le sponsa ex le tenta marital. ¹⁷ Que le prestres e le attendentes de Deo plora inter le vestibulo e le altar e dice: "Sparnia, Deo, vostre populo e non cede vostre hereditage al disgratia, al gentiles pro dominar super illes; proque on dicerea inter le populos: ubi es lor Deo?"

¹⁸ Alora Deo sera zelose pro su terra e habera pietate de su populo. ¹⁹ E Deo respondera e dicera a su populo: "Ecce io vos inviara le grano e le musto e le oleo, e vos sera satiate de isto e non vos cede al disgratia inter le populos; ²⁰ E io levara ab vos iste multitude del nord^[7] e lo rejectara a un terra deserte e aride: su fronte verso le mar del est, le retroguarda verso le mar del west e su fetidessa ascendera e su malodor se elevara...!" Proque Ille face cosas grandiose. ²¹ Non time, terra, gaude e jubila, proque Deo ha facite cosas grandiose. ²² Non time, bestias del campo, proque le pasturas del deserto verdea, proque le arbore apporta su fructo, le fichiero e le vite da lor vigor. ²³ Anque vos, infantes de Sion, gaude e jubila a Jahweh vostre Deo, proque Ille vos ha date le prime pluvia benefic e Ille dara pro vos le prime pluvia autumnal e le pluvia vernal in le prime mense. ²⁴ E le granarios se plenara de grano e le pressas disbordara de musto e de oleo. ²⁵ E io vos restitue le annos que mangiava le locusta, su larva, le hassil devorator e le gazam le altere insecto, mi armea grande le qual io inviava contra vos. ²⁶ E vos mangiara usque a satietate e vos laudara le nomine de Jahweh, vostre Deo, qui habera facite pro vos meravilias e mi populo non sera avergoniate jammais. ²⁷ E vos sapera que io es in le medio de Israel e io es Jahweh vostre Deo e nemo altere, e mi populo non sera avergoniate jammais.

CAPITULO 3

E^[8] il sera postea que io effundera mi spirito super omne persona, e prophetisara vostre filios e filias, e vostre vetulos soniara sonios, vostre juvenes videra visiones. ² E io effundera mi spirito anque super le servitores e le domesticas in ille dies. ³ E io dara prodigios in le celo e le terra, anque foco e columnas de fumo. ⁴ Le sol se convertera in tenebras e le luna in sanguine ante le advenimento del die grande e terribile de Deo. ⁵ E il sera que cata uno qui invocara le nomine de Deo sera salvate, proque in le monte de Sion e in Jerusalem sera le salvamento como le Senior ha dicite e inter illes qui sera convocate per Deo ex illes qui habera remanite.

CAPITULO 4

Ecce, in ille dies e in ille tempore quando io retornara le captivitate de Judah e Jerusalem; ² io assemblara anque tote le nationes e les facera descender in le valle de Jehoshaphat e io entrara in judicamento ibi contra illes concernente mi populo e mi hereditate Israel, contra illes qui habeva dispergite mi populo e dividite inter se mi pais, ³ e contra illes qui habeva tirate sorte super mi populo e vendite le pueros pro esser prostitutos e vendite le pueras pro vino a biber. ⁴ Nunc que cosa ha vos contra me, Tyro e Sidon, e tote le districtos de Philistea? An vos vole reimbursar me? E si vos me recompensa, io vos retorna le recompensa rapidissimo super vostre capite, ⁵ proque vos habeva prendite mi argento e mi auro e ha levate mi cosas bon e preciose a vostre templos, ⁶ e vos ha vendite le filios de Judah e le filios de Jerusalem al filios de Grecia pro remover les ab lor territorio. ⁷ Ecce io les levara ab le loco ubi vos les habera vendite e io vos retornara le recompensa super vostre capite. ⁸ E io rendera vostre filios e vostre filias in le mano de filios de Judah e illes les vendera a Sabeanos, al nation distante, proque Deo ha parlate. ⁹ Proclama isto inter le nationes, prepara vos al guerra sancte, evelia le homines valente, face le guerreros approchar se, que tote le guerreros veni! ¹⁰ Forgia gladios ab vostre palas e lanceas ab vostre cisorios a putar, e face le debile dicer: Io es valente! ¹¹ Hasta e ascende, tote le nationes de omne parte circum, e congrega ubi Deo face descender vostre guerreros. ¹² Que le nationes surge e ascende in le valle de Jehoshaphat proque ibi io sedera a judicar tote le nationes de omne parte. ¹³ Gira le falce, proque le recolta es matur, veni, descende, proque le pressa es plenate, le barriles disborda, proque grande es lor maleficentia. ¹⁴ Il ha grande multitudes in le valle del decision, proque approcha le die de Deo in le valle del decision. ¹⁵ Le sol e le luna obscura e le stellas retene lor luce. ¹⁶ E le Senior rugira ab Sion e emittera su voce e tremera le celo e le terra, ma le Senior sera le refugio de su populo e le fortalessa pro le infantes de Israel. ¹⁷ E vos sapera que io es le Senior vostre Deo, qui habitara in Sion in mi monte sancte e Jerusalem sera sancte e estranieros non passara plus in illo.

¹⁸ E il sera in ille dies que le montanias guttara de vino nove e le collinas fluera de lacte e tote le canales de Judah fluera de aqua e le fontes del Domo de Deo sortira e irrigara le valle del Acacias. ¹⁹ Egypto devenira un desolation e Edom sera un deserto desolate a causa del violentia facite al filios de Judah, proque illes effundeva sanguine innocente in lor paises. ²⁰ E Judah remanera pro sempre e Jerusalem pro generation e generation. ²¹ E io nettara lor sanguine que io non ha ancora nettate, e le Senior habitara in Sion.

1. gazam - forsan de akkad. "kisimmu": le nomine de un insecto
2. hassil - su signification litteral: "destructor", "devorator"; probabilemente un sorta de locusta.
3. in le original: "aryeh" e "lavi" es synonymos
4. in le original Shaddaï: le signification incerte
5. le signification original del verbo hebree par'rur es incognite. Illo appare in le biblia solmente duo vices: hic e Neh. 2:11. Illo pote significar pallor e nigritia.
6. le verbo hebree ’abat es cognate con un altere verbo trovabile anque un vice in le biblia ("hapax legomenon"). Vide Micha 7:3 ’abatt: "perverter".
7. tsefoni - "del nord" — hapax legomenon — forsan le locustas.
8. Le versos 28, 29, 30, 31, ³² in le versiones non-hebree del capitulo ² pertine al capitulo ³ (gimel), e tote le resto del versos ibi pertine al capitulo ⁴ (daleth) del version original hebree.