HAGGAI

CAPITULO 1

In le secunde anno del rege Darius, al prime die del sexte mense, le parola del Senior era per le propheta Haggai a Zerubabel, le filio de Jehozadak, le archiprestre, dicente:

² Assi diceva le Senior del hostes: iste populo diceva: le tempore non veniva, le tempore pro le construction del domo del Senior. ³ Ma le parola del Senior era per le propheta Haggai dicente:

⁴ Esque il ha le tempore pro vos a accommodar vos in vostre casas e iste domo es jacente guastate? ⁵ Dunque, nunc, assi diceva le Senior del hostes: Considera vostre vias! ⁶ Vos ha seminate multo e recoltate pauco, vos mangia ma non satis, vos bibe ma non ad ebriar vos, on es vestite ma non ha calor, le salariato pone su salario in un sacco con cavos. ⁷ Assi diceva le Senior: Considera vostre vias! ⁸ Ascende al monte e apporta ligno e construe le domo e isto me placera e io sera glorificate — diceva le Senior. ⁹ Vos expecta multo e ecce il ha pauco, e quando vos lo apporta a casa io suffla super isto — quia? — Le parola del Senior, quia mi domo jace desolate e cata uno de vos curre a su casa. ¹⁰ A causa de isto le celo se abstine de dar le rore e le terra retene su rendimento. ¹¹ E io appellava le siccitate super le terra e le montes e super le grano e le musto e le oleo, e super le recolta del terra e super le homines e le bestial e super omne labor del manos.

¹² Alora audiva Zerubabel, le filio de Shealtiel, e Jehoshuah, le filio de Jehozadak, le archiprestre, e tote le resto del populo, le voce del Senior lor Deo e le parolas del propheta Haggai qui era inviate per le Senior lor Deo, e le populo habeva timor del Senior. ¹³ E Haggai, le messagero del Senior, diceva per le message del Senior al populo dicente: Io es con vos, le parola del Senior. ¹⁴ E le Senior eveliava le spirito de Zerubabel, le filio de Shealtiel, le governator de Judah, e le spirito de Jehoshuah, le filio de Jehozadak, le archiprestre, e le spirito del resto del populo, e illes veniva e faceva le labor in le domo del Senior del hostes lor Deo. ¹⁵ Al vinti-quarte die del sexte mense, le secunde anno del regno del rege Darius.

CAPITULO 2

Al vinti-prime die del septime mense era le parola del Senior per le propheta Haggai dicente: ² Dice nunc a Zerubabel, le filio de Shealtiel, le governator de Judah, e a Jehoshuah, le filio de Jehozadak, le archiprestre, e le residuo del populo dicente:

³ Qui es inter vos qui videva iste domo in su prime gloria e como vos lo vide nunc; nonne isto es como nihil in vostre oculos? ⁴ Dunque nunc, sia forte, Zerubabel, le parola del Senior, e sia forte, Jehoshuah, le filio de Jehozadak, le archiprestre, e sia forte, tote le populo del pais, le parola del Senior, e labora proque io es con vos, le parola del Senior del hostes. ⁵ Secundo le parola del convention que io faceva con vos quando vos exiva de Egypto, e mi spirito sta inter vos, non ha timor. ⁶ Proque assi diceva le Senior del hostes: ancora un breve tempore e io succutera le celo e le terra e le mar e le terra firme. ⁷ E io succutera tote le nationes e le cosas costose de tote le nationes venira, e io replenara iste domo de gloria — diceva le Senior de hostes. ⁸ Le argento es le mie e le auro es le mie — le parola del Senior del hostes. ⁹ Le gloria de iste domo ulterior sera plus grande que illo del domo prime — diceva le Senior del hostes, e in iste domo io dara le pace — le parola del Senior del hostes.

¹⁰ Al vinti-quarte die del none mense in le secunde anno de Darius, era le parola del Senior al propheta Haggai dicente: ¹¹ Assi diceva le Senior del hostes: Demanda nunc le prestres super le lege dicente: ¹² Si on porta carne sancte in le gonna de su vestimento e su gonna tocca le pan o le victualia cocte, le vino, o le oleo, o qualcunque alimento, esque isto es sancte? E le prestres diceva: No. ¹³ Alora Haggai diceva: Si uno qui es immunde per un cadavere tocca alicun de istos, esque isto deveni immunde? E le prestres respondeva dicente: isto deveni immunde. ¹⁴ Alora Haggai respondeva dicente: Assi es iste populo e tote iste nation ante me, le parola del Senior, e omne labor de lor manos de qual illes sacrifica ibi, es immunde. ¹⁵ Dunque nunc, io vos preca, considera ab iste die e avante, ante que vos pone un petra a un altere petra in le templo del Senior. ¹⁶ Quando on veniva a un cumulo de vinti e il habeva dece, e on veniva al cellario de vino pro haurir un mensura de cinquanta e il habeva vinti; ¹⁷ io vos batteva con le siccitate e con le mucor, e con le grandine tote vostre labor del mano e totevia vos non retornava a me, le parola del Senior. ¹⁸ Dunque considera, io vos preca, ab iste die e avante, del vinti-quarte die del none mense, depost le die quando era fundate le templo del Senior — considera isto. ¹⁹ Esque il ha ancora le semine in le granario? Usque al vite, le fichiero e le granata e le arbore de oliva ancora non ha producite ab iste die; ab iste die io va benedicer vos.

²⁰ Al vinti-quarte die le parola del Senior era a Haggai ancora un vice, dicente: ²¹ Dice a Zerubabel, le governator de Judah, dicente: Io face tremer le celo e le terra. ²² E io va subverter le sede del regnos del nationes e io destruera le fortia del regnos del nationes e io subvertera le carros e lor guidatores, e le cavallos e lor cavalleros cadera, uno per le gladio del altero. ²³ A ille die, le parola del Senior del hostes, io te levara, o Zerubabel, le filio de Shealtiel, mi servitor — le parola del Senior, e te facera un sigillo, proque io te ha eligite, le parola del Senior del hostes!