Bayniyaz aǵaǵa (T.Seytjanov)
«Álhabbiz» aytayın, ustazım, saǵan,
Túwesilmes bulaq bolıp turıpsań,
Gúller caǵan, sen gúllerge ańsaǵan,
Sırlı qosıq bolıp tarap turıppan.
Gúl jaynaǵan bul baxıtlı kúninde,
Shayırlıq pal tamıp shiyrin tilinde,
Jolay kórmeńiz, dep, qızıl gúlime,
Búlbillerdiń aldın orap turıpsań.
Arasında shaǵlap gúl-lalalardıń,
Sazlarıńdı jańlap shoq namalardıń,
Kewil bántin ashıp «Gúlnara»lardıń,
Júrek alǵısların tıńlap turıpsań.
Shıǵıp alıp qutlı alpıs jasına,
Shákirtlerdi jıynap alıp qasıńa,
Minip «Kók emen»niń ushabasına,..
«Zoyam kayaqta?» dep sorap turıpsań.
Ele jas jigittey iste tayınsań,
Súymege de kúymege de kayılsań,
Ármanı joq, xalqı súygen shayırsań,
Bálent alıslarǵa qarap turıpsań.
Saw bol, aǵa, uzaq jasap arada,
Qızıl gúlden basqalarǵa qarama,
«Ashıqlıqtıń dártin bizden sorama,
Oǵan óziń ǵana shıdap turıpsań!»