Baxıt jolı (Qayıpnazarov)
Nókisten baslandı sayaxatımız,
Samarqand sayqalı ózine tarttı,
Júreklerde sheksiz muhabbatımız.
Tuwısqanlıq, doslıq sezimler arttı.
Karasań kóz jetpes usha basına,
Aynalası tawlıq gúlistan bir jer,
Kók maysası usas qızdıń shashına,
Sayran etip júrmiz bul jerde bizler.
Dúnyaga diykannıń dańqın taratqan,
Paxtakesh erleri Ózbekstannıń,
Óz miyneti menen jánnet jaratqan,
Batır adamları bul gúlistannıń.
Shashları meyizdey qızların kórsem,
Men qarındas desem, ol áke deydi.
Júzleri ashılǵan ananı kórsem,
Men qız apa desem, ol úke deydi.
Qaysı bir háwlini kewlim tilese,
Kirip barsam óz úyimdey sezemen,
Biyik tawlarına shıqsam bir ese,
Kóshelerin óz kóshemdey gezemen.
Bizdi alıp keldi bul baxıt jolı,
Nawayı, Uluǵbek jasaǵan jerge,
Taslarǵa eriksiz gúl oyǵan qolı,
Erkin miynet ushın bosaǵan jerge.